قازاقستانعا عاشىق بولعان امەريكاندىق كاسىپكەر ا ق ش-تان 40 تۋريست الىپ كەلمەكشى
دەۆيد ۆالەرا - امەريكاندىق بيزنەسمەن، ول ءوز وتانداستارىن قازاقستاننىڭ مادەنيەتى جانە سالت- داستۇرىمەن تانىستىرعىسى كەلەدى. قازاقستان حالقىن قوناق جاي دەپ سانايتىن كاسىپكەر، تۋريستىك ساپارى ارقىلى امەريكاندىقتاردىڭ قازاق ەلى تۋرالى پىكىرىن وزگەرتۋگە نيەتتى.
قازاقستانعا عاشىق بولعان امەريكاندىق كاسىپكەر ا ق ش- تان 40 تۋريست الىپ كەلمەكشى
بۇل تۋرالى حابار 24 تەلەارناسى حابارلادى.
«بارلىعى قازاقستاندى نەگە سونشا جاقسى كورەسىڭ، بۇل ساپاردىڭ نە قاجەتى بار دەپ سۇرايدى. بۇل سۇراقتىڭ جاۋابى وتە قاراپايىم. مەن 60-تان استام ەلدى ارالادىم. ءبىراق بارىنەن دە قازاقستان حالقى ەرەكشە مەيىرىمدى، قوناقجاي. امەريكاندىق رەتىندە ايتاتىن بولسام، ءبىز تەك ءبىر تىلدە عانا سويلەپ جەتىستىككە جەتەتىن الەمدەگى جالعىز ەلمىز. ال قازاقستان سياقتى ەل تۇرعىندارى ەكى، ءۇش، ءتورت، ءتىپتى بەس تىلدە سويلەي الاتىن ءبىلىمدى ءارى تابىستى حالىق جوق. ولار كوپتەگەن مادەنيەتتى بويىنا سىڭىرگەن قوناقجاي ەل»، - دەيدى كاسىپكەر.
قازاقستانعا ا ق ش- تان العاشقى تۋريستەر 17-شىلدەدە كەلەدى.
«ءبىزدىڭ جوبامىزدىڭ ەرەكشەلىگى ءبىز ءبىرىنشى كەزەكتە اقشا تابۋعا تىرىساتىن تۋريستىك كومپانيالار سەكىلدى جۇمىس جاسامايمىز. وسى جوبا قازاقستاندىق وتباسىلاردىڭ قاتىسۋىمەن جۇزەگە اسادى. سەبەبى، امەريكاندىقتار تۋريستەر قوناق ۇيدە ەمەس، وسىنداي وتباسىلاردا توقتايدى. مىسالى، ولار قازاق تويلارىنىڭ قوناقتارى بولادى، ياعني جەرگىلىكتى مادەنيەتكە تەرەڭ ەنەدى»، - دەپ ءتۇسىندىردى ۆالەرا.
امەريكاندىق كاسىپكەر 13-تەن 17 جاس ارالىعىنداعى وقۋشىلارمەن جۇمىس ىستەيتىن كومپانيامەن دە ىنتىماقتاستىقتا. دەۆيد ۆالەرا سونداي-اق، امەريكاندىق ستۋدەنتتەردى قازاقستانعا الىپ كەلىپ، سونىڭ ىشىندە ۆولونتەرلىك باعدارلاماعا قاتىستىرۋ مۇمكىندىگى تۋرالى ويلاستىردى. ول وسى جولمەن ستۋدەنتتەردىڭ قازاقستاننىڭ مادەنيەتى مەن كورنەكتى جەرلەرىن كورىپ قانا قويماي، اعىلشىن ءتىلىن ۇيرەتەتىن ۆولونتەرلەر بولاتىنىن جوسپارلادى.
