استانا 40 گرادۋس ايازدارعا قالاي دايىندالىپ جاتىر؟
ەلوردا اكىمىنىڭ باسپا ءسوز حاتشىسى استانادا ەنەرگەتيكالىق كەشەننىڭ الداعى قاتتى ايازعا دايىندىعى تەكسەرىلگەندىگىن، سونداي-اق ولاردىڭ تاۋلىك بويى جۇمىس ىستەۋ رەجيمىنە كوشكەندىگىن ايتتى.
«استانا قالاسى اكىمى اسەت يسەكەشيەۆتىڭ تاپسىرماسىمەن بۇل ىسكە جاۋاپتى باسشىلار كۇننىڭ سۋىتۋىنا وراي ەنەرگەتيكالىق كەشەننىڭ دايىندىعىن تەكسەرۋ ماقساتىندا جينالىس وتكىزدى.
اتاپ وتسەك، قالانى ەلەكتر ەنەرگياسىمەن ۇزدىكسىز قامتاماسىز ەتىپ وتىرعان قوسالقى ستانسيالار، سونىڭ ىشىندە «شۇبار» ستانتياسى، «استانا ر ە ك» ا ق ورتالىق ديسپەتچەرلىك بولىمشەسى ەلەكتر جۇيەسىنىڭ جۇمىسى تەكسەرىلدى.
جيىندا ەنەرگەتيكالىق كەشەندەردىڭ باسشىلارى ايازعا دايىندىق جۇمىستارىنىڭ بارىسى تۋرالى باياندادى. كۇن تارتىبىنە تاۋلىك بويى كەزەكشىلىك قويۋ، ەلەكتر جۇيەلەرىنىڭ جۇمىسىن 10 پايىزعا، جەدەل بريگادا جۇمىسىن ەكى ەسەگە ارتتىرۋ تۇر.
سونداي-اق اياز كەزىندە جاۋاپتى ماماندار مەن تاۋلىك بويى كەزەكشىلىك ەتەتىندەردىڭ جۇمىس كەستەسى جاسالىنىپ، جىلۋ ستانتسيالارىن قۇرۋ تاپسىرىلعان ج ە و -2 - ءنىڭ دايىندىعى دا تەكسەرىلدى. قازىرگى ۋاقىتتا 30 تاۋلىككە جەتەتىن كومىر قورى مەن 15 كۇنگە جەتەتىن مازۋت وتىنى بار»، - دەپ جازادى ول فەيسبۋكتەگى پاراقشاسىندا.
ەسكە سالا كەتەيىك، استانا قالاسىنىڭ اكىمى اسەت يسەكەشيەۆ الداعى كۇندەرى تەمپەراتۋرانىڭ تومەندەۋىنە بايلانىستى قالا تۇرعىندارىن قاۋىپسىزدىك شارالارىنا نازار اۋدارۋعا شاقىرعاندىعى تۋرالى بۇعان دەيىن جازعان بولاتىنبىز.
قازگيدرومەت تاراتقان مالىمەتتەرگە قاراعاندا، 22- قاڭتاردان باستاپ، اسىرەسە 23-26- قاڭتار ارالىعىندا اۋا-رايى كۇرت سۋىتىپ، اۋا تەمپەراتۋراسى -35 - 40 گرادۋسقا دەيىن تومەندەۋى مۇمكىن.
اۆتور: گۇلسايا جاقان
