وتكەن دەمالىستا قازاقستاندىقتار تۇركيا باعىتىنداعى 400 گە جۋىق اۋە بيلەتىن كەرى قايتارعان

الماتى. قازاقپارات - قازاقستاندىقتار وتكەن دەمالىس كۇندەرى تۇركياعا باعىتتالعان 400 گە جۋىق اۋە بيلەتىن كەرى قايتارعان.

بۇل تۋرالى بۇگىن الماتىدا جۋرناليستەرمەن بولعان كەزدەسۋدە «ەير استانا» ا ق كومپانياسىنىڭ پرەزيدەنتى پيتەر فوستەر ءمالىم ەتتى.

«قازىر تۇركياعا ارنالعان ترافيكتىڭ دۋباي، بانگكوك، ۆەتنام، گرۋزياعا باعىتتالىپ جاتقاندىعى بايقالادى»، - دەدى پ. فوستەر.

ول سونىمەن قاتار، وتكەن دەمالىس كۇندەرى تۇركيا باعىتى بويىنشا ساتىپ الىنعان 400 گە جۋىق بيلەتتىڭ كەرى قايتارىلعاندىعىن، فرانسيا باعىتىنداعى بيلەتتەردىڭ وتە از مولشەردە قايتارىلىپ جاتقاندىعىن اتاپ ءوتتى.

«ءبىراق، بۇل جەردە تۇركياعا باعىتتالعان بيلەتتەر جاپپپاي قايتارىلىپ جاتىر دەپ ايتۋعا بولمايدى. دەگەنمەن، ناقتى انتاليانى الىپ قارايتىن بولساق، وتكەن جىلمەن سالىستىرعاندا جولاۋشىلار سانى ەلەۋلى تۇردە ازايدى»، - دەدى كومپانيا پرەزيدەنتى.

اۆتور: ايبوتا جاپپاربەرگەن