4 پايىزدىق اۆتونەسيە نەگە كەلمەسكە كەتتى - مينيستر جاۋابى

استانا. KAZINFORM - ونەركاسىپ جانە قۇرىلىس ءمينيسترى قانات شارلاپايەۆ ۇكىمەت وتىرىسىنان كەيىن وتكەن باسپا ءسوز ءماسليحاتىندا 4 پايىزدىق اۆتونەسيە نەگە كەلمەسكە كەتكەنىن ايتتى.

«بۇل سۇراققا وسىعان دەيىن دە جاۋاپ بەرگەنبىز. جەڭىلدەتىلگەن نەسيەگە ەشكىمنىڭ كوڭىلى تولىپ وتىرعان جوق. سەبەبى تۇسىنىكتى، نيەت بىلدىرۋشىلەر كوپ، ال بولىنەتىن اقشا شامالى. ءبىراق اۆتووندىرۋشىلەر دە، قارجى نارىعى دا ءبىر ورىندا توقتاپ تۇرمايدى. مىسالى، قازىر ۇكىمەت زاڭنامالىق تۇرعىدا جەكە تۇلعالارعا ليزينگتى ەنگىزۋ تەتىگىن قولداپ وتىر. ەكىنشىدەن، اۆتوكولىك ساتاتىن كومپانيالاردىڭ ءوزى ءارتۇرلى قارجىلىق قۇرالداردى پايدالانىپ، كولىكتى ءبولىپ تولەۋگە بولاتىن جاعداي جاسادى»، - دەدى مينيستر.

قانات شارلاپايەۆ جەڭىلدەتىلگەن اۆتونەسيەدەن تۇسكەن قاراجات قوعامدىق كولىكتەردى دامىتۋعا باعىتتالاتىنىن ەسكە سالدى.

«جەڭىلدەتىلگەن اۆتونەسيەگە بولىنگەن قاراجات وتە دۇرىس بولدى دەپ ويلايمىن. قاراجات قالالار مەن وبلىس ورتالىقتاردا قوعامدىق كولىكتەردى قولداۋعا باعىتتالدى. ءبىز قالاىشىلىك قانا ەمەس، اۋدانارالىق كولىكتەرگە دە جۇمسادىق. مۇنداي ۇستانىم دۇرىس دەپ ەسەپتەيمىن. اۆتوكولىكتەرگە جەڭىلدەتىلگەن نەسيە بەرۋدىڭ ورنىنا قوعامدىق كولىكتەردىڭ ساپاسىن ارتتىرۋعا جۇمساپ وتىرمىز. سەبەبى ونى حالىق كوبىرەك پايدالانادى. جەڭىلدەتىلگەن اۆتونەسيەنى ءبىز ءبىر جارىم جىل بۇرىن جاپتىق. قازىر ول قاراجات قوعامدىق كولىكتەردى دامىتۋعا باعىتتالىپ وتىر»، - دەدى قانات شارلاپايەۆ.

اۆتور
ەسىمجان ناقتىباي