تۇركيادا 4,7 ماگنيتۋداسىمەن جەر سىلكىندى
بۇل تۋرالى تۇركيا ۇكىمەتى جانىنداعى توتەنشە جاعدايلاردىڭ الدىن الۋ جانە سالدارىن جويۋ باسقارماسىنان (AFAD) ءمالىم ەتتى، دەپ حابارلايدى قازاقپارات انادولى اگەنتتىگىنە سىلتەمە جاساپ.
جەراستى ءدۇمپۋى جەرگىلىكتى ۋاقىتپەن 09:47 دە گەكسۋن اۋدانىندا تىركەلدى. ءزىلزالا وشاعى 7 شاقىرىم تەرەڭدىكتە ورنالاستى.
قازا تاپقاندار مەن قيراعان عيماراتتار تۋرالى اقپارات تۇسكەن جوق.
ەسكە سالايىق، 6- اقپاندا تۇركيانىڭ كاحرامانماراش پروۆينتسياسىندا قۋاتى 7 بالدان اساتىن ەكى جەر سىلكىنىسى بولدى. تەربەلىس ەلدىڭ 10 پروۆينتسياسىندا، سونداي-اق كورشىلەس مەملەكەتتەردە، سونىڭ ىشىندە سيريادا سەزىلدى.
ماماندار ايماقتا جەراستى دۇمپۋلەرى ءالى دە جارتى جىل بويى جالعاسادى دەگەن بولجام جاسادى. تۇركيادا جويقىن ءزىلزالا بولاتىنىن بولجاعان نيدەرلاند زەرتتەۋشىسى فرانك حۋگەربيتس ناۋرىز ايىنىڭ باسىندا جاڭا اپاتتار كۇتىلەتىنىن ەسكەرتتى.
7- ناۋرىزدا تۇركيانىڭ حاتاي، كاحرامانماراش جانە كايسەري پروۆينتسيالارىندا ءۇش جەر سىلكىنىسى بولدى.
اقپان ايىندا بولعان تابيعي اپاتتان تۇركياعا كەلگەن شىعىن 100 ميلليارد دوللاردان اسۋى ىقتيمال.
تۇرىك پوليتسياسى قيراعان عيماراتتار ءىسى بويىنشا كۇدىكتى رەتىندە 269 ادامدى ۇستادى.
سوڭعى رەسمي دەرەكتەرگە سايكەس، تابيعي اپات 48 مىڭعا جۋىق ادامنىڭ ءومىرىن قيدى.
