قازاقستاندىقتار سوڭعى التى جىلدا 4,6 توننا التىن قۇيما ساتىپ العان

استانا. قازاقپارات - 2023-جىلدىڭ شىلدە ايىندا ەكىنشى دەڭگەيلى بانكتەر مەن بانكتىك ەمەس جەكەلەگەن ايىرباستاۋ پۋنكتەرىندە جالپى سالماعى 111,1 كەلى 2787 التىن قۇيما ساتىلدى، دەپ حابارلايدى قازاقپارات ۇلتتىق بانككە سىلتەمە جاساپ.

حالىققا تازارتىلعان التىن قۇيما ساتۋ جانە ساتىپ الۋ باعدارلاماسىن ۇلتتىق بانك 2017-جىلى ىسكە قوسقان بولاتىن.

باعدارلاما قولعا الىنعالى جالپى سالماعى 4,6 توننا 135183 التىن قۇيما ساتىلدى.

التىن قۇيمالار بەس ءتۇرلى سالماقتا ۇسىنىلادى: 5، 10، 20، 50 جانە 100 گرام.

ساتىپ الۋشىلار اراسىندا جوعارى سۇرانىسقا يە ءتۇرى - 10 گرامدىق التىن قۇيما. جالپى ساتىلعان قۇيمالار اراسىندا ونىڭ ۇلەسى %26 - 35125 دانا.

ودان كەيىن 5 گرامدىق التىن قۇيما - 30738 دانا (%23)، 100 گرامدىق قۇيما - 28389 دانا (%21)، 20 گرامدىق قۇيما - 24686 دانا (%18)، جانە 50 گرامدىق قۇيما - 16245 دانا (%12).

2023-جىلدىڭ شىلدە ايىندا التىن قۇيما كوپ ساتىلعان وڭىرلەر: الماتى (1275 دانا، %46)، شىمكەنت (756 دانا، %27) جانە استانا (151 دانا، %5).

التىن قۇيمالار سەنىمدى ينۆەستيتسيا قۇرالى بولا الادى. التىن قۇيمالار نارىعىنداعى وتىمدىلىكتىڭ باستى كەپىلى - بانك پەن بانكتىك ەمەس ايىرباستاۋ پۋنكتەرى كليەنتكە اقشانى سول مەزەتتە تولەي وتىرىپ، قۇيمالاردى كەرى ساتىپ الا الادى.

باعدارلاما ىسكە قوسىلعالى ەكىنشى دەڭگەيلى بانكتەر مەن بانكتىك ەمەس جەكەلەگەن ايىرباستاۋ پۋنكتەرى جالپى سالماعى 623,0 كەلى 23710 التىن قۇيمانى كەرى ساتىپ العان.

بۇل - جالپى ساتىلعان قۇيمالاردىڭ %18.

كەرى ساتىپ الىنعان التىن قۇيمانىڭ بارلىعى حالىققا ۇلتتىق بانكتىڭ فيليالدارى ارقىلى ساتىلادى.

قازىر التىن قۇيمالاردى Halyk Bank، ەۋرازيالىق بانك، Jusan Bank، سەنتركرەديت بانكى مەن بانكتىك ەمەس جەكەلەگەن ايىرباستاۋ پۋنكتەرىنەن ساتىپ الىپ، كەرى ساتۋعا بولادى.