ارداگەرلەرگە 4,6 ميلليارد تەڭگەگە ءبىرجولعى ماتەريالدىق كومەك كورسەتىلەدى - مينيسترلىك
بيىلعى 1-مامىرداعى جاعداي بويىنشا، قازاقستاندا ەكىنشى دۇنيەجۇزىلىك سوعىسقا (ە د س) قاتىسقان 222 ارداگەر، 60106 - سوعىس مۇگەدەگى جانە جەڭىسكە ۇلەس قوسقان وزگە دە ازاماتتار تۇرادى. ولاردىڭ ىشىندە: قورشاۋداعى لەنينگراد تۇرعىندارى - 78 ادام؛ كامەلەتكە تولماعان كەزدە كونسلاگەردە بولعان - 175 ادام؛ قايتىس بولعان سوعىس مۇگەدەگىنىڭ جۇبايلارى - 2413 ادام؛ سوعىستا قازا تاپقان (قايتىس بولعان، حابار- وشارسىز كەتكەن) جاۋىنگەرلەردىڭ جەسىرلەرى - 4 ادام؛ تىل ەڭبەككەرلەرى - 57436 ادام.
ارداگەرلەر مەن تىل ەڭبەككەرلەرىنە كورسەتىلەتىن قامقورلىق
بىرىنشىدەن، زەينەتاقى جانە وزگە دە الەۋمەتتىك تولەمدەردىڭ مولشەرى جىل سايىن ارتىپ كەلەدى. ازاماتتاردىڭ 20 ساناتىنا (سوعىسقا قاتىسۋشىلار، تىل ەڭبەككەرلەرى، جانە ت. ب. ) وزگە دە الەۋمەتتىك تولەمدەرگە قاراماستان، ارناۋلى مەملەكەتتىك جاردەماقى تولەۋ جۇزەگە اسىرىلادى.
2023 -جىلعى 1-مامىرداعى جاعداي بويىنشا زەينەتاقىنى ەسكەرە وتىرىپ، اي سايىن بەرىلەتىن الەۋمەتتىك تولەمدەردىڭ ورتاشا جيىنتىق مولشەرى:
- سوعىس قاتىسۋشىلارى - 220754 تەڭگە (161 ادام)؛
- سوعىس مۇگەدەكتەرى - 229286 تەڭگە (61 ادام)؛
- باسقا مەملەكەتتەر (اۋعانستان، ۆەتنام، الجير، مىسىر، يراك جانە ت. ب. ) اۋماعىنداعى اسكەري ءىس- قيمىلدارعا قاتىسۋشىلار - 215201 تەڭگە (25752 ادام)؛
- سوعىس قاتىسۋشىلارىنا تەڭەستىرىلگەندەر - 182782 تەڭگە (3648 ادام)؛
- سوعىس مۇگەدەكتەرىنە جەڭىلدىكتەر بويىنشا تەڭەستىرىلگەندەر - 140838 تەڭگە (14424 ادام)؛
- تىل ەڭبەككەرلەرى - 148892 تەڭگە (57436 ادام).
ەكىنشىدەن، ارداگەرلەردى الەۋمەتتىك قولداۋدىڭ قوسىمشا شارالارى كورسەتىلۋدە. ولاردىڭ بارلىعى اسكەري قىزمەتشىلەر ءۇشىن قولدانىلاتىن قۇقىقتار مەن كەپىلدىكتەرگە يە. سالىق سالۋ بويىنشا جەڭىلدىكتەردى پايدالانادى، استانا جانە الماتى قالالارىنداعى مامانداندىرىلعان گوسپيتالداردا بىلىكتى مەديتسينالىق كومەك كورسەتىلەدى، ساناتورلىق- كۋرورتتىق ەمدەۋ ۇسىنىلادى (367 ميلليون تەڭگەگە 1989 ادام).
سونداي- اق، جەرگىلىكتى اتقارۋشى ورگاندار بيۋدجەت جانە تارتىلعان (دەمەۋشىلىك) قاراجات ەسەبىنەن ارداگەرلەرگە مەرەكەلىك (ەستەلىك) كۇندەرگە ماتەريالدىق كومەك تۇرىندە جانە كەلەسى نىساندا قوسىمشا الەۋمەتتىك قولداۋ تۇرلەرىن كورسەتەدى: تۇرعىن ءۇيدى جوندەۋ (20,4 ميلليون تەڭگەگە 114 ارداگەر)، وتىنمەن قامتاماسىز ەتۋ (179,3 ميلليون تەڭگەگە 3384 ادام)، قوعامدىق كولىكتە جول ءجۇرۋ جەڭىلدىكتەرى (116,8 ميلليون تەڭگەگە 6463 ادام)، ءدارى- دارمەكپەن قامتاماسىز ەتۋ (56,4 ميلليون تەڭگەگە 4826 ادام)، ءتىس پروتەزدەۋ (22 ميلليون تەڭگەگە 239 ادام)، ازىق- تۇلىك توپتاماسى (81,3 ميلليون تەڭگەگە 8097 ادام) جانە الەۋمەتتىك كومەكتىڭ باسقا دا تۇرلەرى.
ۇشىنشىدەن، جىل سايىن ءبىرجولعى ماتەريالدىق كومەك تولەۋ داستۇرگە اينالدى. جەڭىس كۇنى قارساڭىندا جەرگىلىكتى اتقارۋشى ورگاندار 4,6 ميلليارد تەڭگە سوماسىندا ءبىرجولعى كومەك كورسەتۋدى كوزدەپ وتىر.
ماتەريالدىق كومەكتىڭ ەڭ تومەنگى كەپىلدەندىرىلگەن شەگى 1,5 ميلليون تەڭگەدەن كەم ەمەس مولشەردە بەلگىلەنگەن (اقتوبە جانە پاۆلودار وبلىستارىندا - 2 ميلليون تەڭگە).
بارلىق ساناتتار بويىنشا تولەمدەر 9-مامىرعا دەيىن اياقتالادى.
تورتىنشىدەن، مەملەكەت الەۋمەتتىك زاڭنامانى جەتىلدىرۋ بويىنشا تۇراقتى نەگىزدە شارالار جۇرگىزۋدە. وسىلايشا، 2020 -جىلى «ارداگەرلەر تۋرالى» قازاقستان رەسپۋبليكاسىنىڭ زاڭى قابىلداندى، وندا ارداگەرلەرگە بەرىلەتىن جەڭىلدىكتەر مەن كەپىلدىكتەر شوعىرلاندىرىلدى. ول جاڭادان ەنگىزىلگەن ارداگەرلەر ساناتتارىنىڭ ىشىنەن 11 مىڭ ادامعا اي سايىن ارنايى مەملەكەتتىك جاردەماقى الۋعا، سونداي- اق ارداگەرلەر ءۇشىن بارلىق جەڭىلدىكتەر مەن كەپىلدىكتەردى پايدالانۋعا مۇمكىندىك بەردى.
