جىل باسىنان بەرى شەكارانى 4,5 مىڭعا جۋىق ادام زاڭسىز كەسىپ وتپەك بولعان

استانا. قازاقپارات - ۇلتتىق قاۋىپسىزدىك كوميتەتى ءتوراعاسىنىڭ ورىنباسارى - شەكارا قىزمەتىنىڭ ديرەكتورى ەرلان الداجۇمانوۆ سەنات كۋلۋارىندا جىل باسىنان بەرى شەكارانى 4,5 مىڭعا جۋىق ادام زاڭسىز كەسىپ وتپەك بولعانىن ايتتى، دەپ حابارلايدى قازاقپارات ءتىلشىسى.

«بيىلعى I توقساندا شەكارانى زاڭسىز كەسىپ وتپەك بولعان 4,5 مىڭعا جۋىق ادام ۇستالدى. بۇل بۇكىل شەكارا قىزمەتى بويىنشا جيناقتالعان مالىمەت. ولاردىڭ شەكارانى بۇزۋ ارەكەتتەرى ءتۇرلى سيپاتتا بولدى. ونىڭ ىشىندە ءبىزدىڭ ەلگە كىرمەك بولعاندار دا، بىزدەن شىعىپ كەتپەك بولعاندار دا بار. شەكارامىزعا زاڭسىز ءوتۋ ارەكەتتەرى نەگىزىنەن كورشىلەس مەملەكەتتەردەن تىركەلدى. اۋعانستان، سيريا مەملەكەتتەرىنەن وتپەك بولعاندار جوق. پاكىستاننان ءبىر ادام بولدى. مۇنداي تۇلعالار قازاقستان اۋماعىن ادەتتە ترانزيت رەتىندە، ەۋروپا ەلدەرىنە شىعۋ ءۇشىن پايدالانادى. ولاردىڭ ءبارىنىڭ ۇستىنەن قىلمىستىق ءىس قوزعاپ، انىقتايمىز دا، ەكستراديتسيالايمىز»، - دەدى ەرلان الداجۇمانوۆ.