ۇلتتىق ۆاليۋتاداعى دەپوزيتتەر ءبىر ايدا 4,5 پايىزعا ارتتى
بۇل تۋرالى ق ر ۇلتتىق بانكىنەن ءمالىم ەتتى، دەپ حابارلايدى قازاقپارات ءتىلشىسى.
«رەزيدەنتتەردىڭ دەپوزيتتىك ۇيىمدارداعى دەپوزيتتەرىنىڭ كولەمى ءبىر ايدا 7,6 پايىزعا ارتىپ (جىلدىق ماندە ءوسۋ 8,1 پايىز بولدى)، 2022-جىلعى ماۋسىمنىڭ سوڭىندا 27162,9 ميلليارد تەڭگە بولدى. زاڭدى تۇلعالاردىڭ دەپوزيتتەرى ءبىر ايدا 13801,2 ميلليارد تەڭگەگە دەيىن 8,2 پايىزعا ۇلعايدى، جەكە تۇلعالاردىڭ دەپوزيتتەرى 13361,7 ميلليارد تەڭگەگە دەيىن 7 پايىزعا ءوستى»، - دەلىنگەن ۇلتتىق بانك مالىمەتىندە.
ۇلتتىق ۆاليۋتاداعى دەپوزيتتەردىڭ كولەمى ءبىر ايدا 17581,2 ميلليارد تەڭگەگە دەيىن 4,5 پايىزعا ارتتى.
شەتەل ۆاليۋتاسىنداعى دەپوزيتتەردىڭ كولەمى 9581,7 ميلليارد تەڭگەگە دەيىن 13,9 پايىزعا ءوستى. دوللارلاندىرۋ دەڭگەيى 2022-جىلعى ماۋسىمنىڭ سوڭىندا 35,3 پايىز (2021-جىلعى جەلتوقساندا - 36 پايىز) بولدى.
«زاڭدى تۇلعالاردىڭ ۇلتتىق ۆاليۋتاداعى دەپوزيتتەرى 2022-جىلعى ماۋسىمدا 8715,6 ميلليارد تەڭگەگە دەيىن 3,2 پايىزعا ءوستى، شەتەل ۆاليۋتاسىنداعى دەپوزيتتەر 5085,6 ميلليارد تەڭگەگە دەيىن 18,1 پايىزعا ارتتى. جەكە تۇلعالاردىڭ تەڭگەدەگى دەپوزيتتەرى 8865,6 ميلليارد تەڭگەگە دەيىن 5,8 پايىزعا ۇلعايدى، ال شەتەل ۆاليۋتاسىنداعى دەپوزيتتەرى 4496,1 ميلليارد تەڭگەگە دەيىن 9,5 پايىزعا ارتتى»، - دەپ اتالىپ وتكەن ۇ ب اقپاراتىندا.
بۇدان بۇرىن حابارلانعانداي، بيىل ماۋسىم ايىندا قازاقستاندا ا ق ش دوللارىن ساتىپ الۋ قارقىنى باسەڭدەدى.
