14:14, 11 - جەلتوقسان 2021 | GMT +5
اباي ەسكەرتكىشى ءۇشىن 4,5 ميلليون تەڭگە: اتىراۋ وبلىسى اكىمىنىڭ ورىنباسارى قاماۋعا الىندى
نۇر- سۇلتان. قازاقپارات - سىبايلاس جەمقورلىققا قارسى ءىس- قيمىل اگەنتتىگى اتىراۋ وبلىسى اكىمىنىڭ ورىنباسارى ۇستالعانىن راستادى، دەپ حابارلايدى قازاقپارات.
سىبايلاس جەمقورلىققا قارسى قىزمەت ءوزىنىڭ Telegram پاراقشاسىندا ءمالىم ەتكەندەي، اتىراۋ وبلىسى اكىمىنىڭ ورىنباسارى مەن مادەنيەت، ارحيۆتەر جانە قۇجاتتاما باسقارماسى باسشىسىنا قاتىستى تەرگەۋ باستالدى.
ولار اتىراۋ قالاسىندا اباي ەسكەرتكىشىن جاساۋ جانە ورناتۋ بويىنشا 145 ميلليون تەڭگە سوماسىنا مەملەكەتتىك ساتىپ الۋ شارتىن جاساعانى ءۇشىن ءبىر توپ اداممەن الدىن الا ءسوز بايلاسۋ ارقىلى ج ش س باسشىسىنان 4,5 ميلليون تەڭگە سوماسىندا پارا الۋ كۇدىگىنە ءىلىندى.
كۇدىكتى ۇستالىپ، اتىراۋ قالالىق پوليتسيا باسقارماسىنىڭ ۋاقىتشا ۇستاۋ يزولياتورىنا قامالدى.
«وزگە اقپارات تەرگەۋ مۇددەسىندە جاريا ەتۋگە جاتپايدى» دەلىنگەن حابارلامادا.
