ۇلتتىق قورعا تۇسكەن 4,5 تريلليون تەڭگەنىڭ جارتىسى مۇناي سەكتورىنان كەلگەن
«2019 -جىلدىڭ قورىتىندىسى بويىنشا ۇلتتىق قور قاراجاتى شامامەن 27,5 تريلليون تەڭگەنى نەمەسە 65,5 ميلليارد دوللاردى قۇرادى. وتكەن جىلى ۇلتتىق قورعا شامامەن 4,5 تريلليون تەڭگە، ونىڭ ىشىندە مۇناي سەكتورى ۇيىمدارىنان تۇسەتىن تىكەلەي سالىقتار تۇسىمدەرى ەسەبىنەن 2,8 تريلليون تەڭگە ءتۇستى»، - دەدى ەرۇلان جاماۋبايەۆ قارجى ءمينيسترى و ك ق الاڭىندا وتكەن حالىق الدىندا ەسەپ بەرۋ كەزدەسۋىندە.
مينيستر سونىمەن قاتار، ۇكىمەتتىڭ ەسەپتىلىگى مەن اشىقتىعىنىڭ باستى كورسەتكىشتەرىنىڭ ءبىرى - «اشىق بيۋدجەت» تۇجىرىمداماسىن ىسكە اسىرۋ ەكەنىن ايتىپ ءوتتى. «ونى ەنگىزۋدىڭ ماقساتى - ازاماتتارعا بيۋدجەت پروتسەسىمەن تانىسۋعا جانە بيۋدجەت قاراجاتىنىڭ شىعىستارىن تالقىلاۋعا قاتىسۋعا مۇمكىندىك بەرۋ. «حالىقتىڭ باقىلاۋىنداعى بيۋدجەت» تۇجىرىمداماسى شەڭبەرىندە ازاماتتىق بيۋدجەتتى ءتۇزۋ جانە ۇسىنۋ، جەرگىلىكتى بيۋدجەتتەردىڭ جوبالارىن ازىرلەۋ ماسەلەلەرى نورماتيۆتى تۇرعىدا رەتتەلگەن. 2019 -جىلى نۇر- سۇلتان قالاسىنىڭ سارىارقا اۋدانىندا 100 ميلليون تەڭگەگە 14 جوبا بويىنشا پيلوت وتكىزىلدى. بيىل 600 ميلليون تەڭگەگە جۋىق سوماعا نۇر- سۇلتان قالاسىندا (بارلىق اۋداندار) جانە 1,4 ميلليارد تەڭگەگە الماتى قالاسىندا (8 اۋدان) پيلوتتىق جوبالار ەنگىزىلەدى»، - دەدى ول.
اۆتور: ايان بەكەن ۇلى
