سوڭعى 4 جىلدا ەۋروپادا 170-تەن استام مەملەكەتتىك قىزمەتكەر وقىتىلدى

استانا. قازاقپارات - سوڭعى 4 جىلدا ەۋروپالىق وداق ەلدەرىندە 171 مەملەكەتتىك قىزمەتكەر بىلىمدەرىن جەتىلدىرىپ كەلدى.

بۇل تۋرالى بۇگىن استانادا «مەملەكەتتىك قىزمەتتەگى زاماناۋي ۇردىستەر مەن رەفورمالار» اتتى كونفەرەنسيادا ق ر مەملەكەتتىك قىزمەت جونىندەگى ءمينيستردىڭ ورىنباسارى يننا احمەتوۆا ءمالىم ەتتى.

«قازاقستان ۇكىمەتى مەملەكەتتىك قىزمەتىنىڭ رەفورماسى جانە جاڭعىرتىلۋى» اتتى جوبا اياسىندا 171 مەملەكەتتىك قىزمەتكەر ءۇشىن 25 ساپار ۇيىمداستىرىلدى. جاقىندا عانا ءبىزدىڭ مينيسترلىكتىڭ ساراپشىلىق توبى دانيا مەن نيدەرلاند ەلدەرىندە بولىپ، مەملەكەتتىك قىزمەتتەردى ورتالىقتاندىرۋداعى كادرلاردى جوسپارلاۋ مەن مەملەكەتتىك اپپاراتتى وڭتايلاندىرۋ باعىتىنداعى تاجىريبەلەرىن كورىپ قايتتى»، - دەدى ۆيتسە مينيستر.

ونىڭ ايتۋىنشا، الداعى كۇندەرى مينيسترلىك قىزمەتكەرلەرى ەستونيا مەن ۇلى بريتانياعا باراتىن بولادى.

«وندا ولار مەملەكەتتىك اپپاراتتىڭ جۇمىسىن ءتيىمدى ۇيىمداستىرۋ، ەلەكتروندىق ۇكىمەتتى دامىتۋ، مەملەكەتتىك اپپاراتتاعى قاعازباستىلىقتى ازايتۋ جانە جۇيەنى تولىق وڭتايلاندىرۋ باعىتىندا تاجىريبە الماسادى» ، - دەدى ي. احمەتوۆا.

 ەسكە سالا كەتەيىك، ەۋروپالىق وداقتىڭ «قازاقستان ۇكىمەتى مەملەكەتتىك قىزمەتىنىڭ رەفورماسى جانە جاڭعىرتىلۋى» اتتى جوبا بيىل اياقتالادى. ول ءبىزدىڭ ەلدە 2012 -جىلدىڭ قاڭتار ايىنان باستاپ، ءتورت جىل جۇزەگە اسىرىلىپ كەلدى. ەۋروپالىق وداق جوباعا 4,5 ميلليون ەۋرو قاراجات بولگەن بولاتىن.

 اۆتور: جاسۇلان جولدىبايەۆ