اعىمداعى جىلدىڭ 4 ايىندا 11 رەت جۇرەك الماستىرۋ وپەراتسياسى جاسالعان

استانا. قازاقپارات - ەلىمىزدە اعىمداعى جىلدىڭ 4 ايىندا 11 رەت جۇرەك الماستىرۋ وپەراتسياسى جاسالدى. وسىنداي كۇردەلى ەمگە جىل سايىن شامامەن 140 ناۋقاس ءزارۋ. بۇل كورسەتكىشتىڭ كەمەيتىن ءتۇرى جوق.

ۇمىتتەرىن ۇزبەي، دونور كۇتكەن جانداردىڭ ماسەلەسى استانادا ءوتىپ جاتقان تۇركى الەمى ترانسپلانتولوگتارى قاۋىمداستىعىنىڭ ءبىرىنشى كونگرەسىندە ءسوز بولدى. جيىنعا الەمنىڭ 30 ەلىنەن 300 دەن استام سالا ماماندارى قاتىسىپ، بىلگەن تۇيگەندەرىمەن بولىسۋدە.

 ايتا كەتەيىك، نەبارى 5 اي بۇرىن قۇرىلعان قاۋىمداستىققا ازىرگە قازاقستاننان بولەك، تۇركيا، ازەربايجان، قىرعىزستان، تاجىكستان، وزبەكستان، تۇركىمەنستان مەملەكەتتەرى مۇشەلىك ەتەدى. بارلىعىنىڭ ءوز جەتىستىگى بار. الايدا ەلىمىز ءۇشىن وسى سالادا ۇزدىك ۇشتىكتىڭ قاتارىنان تابىلعان تۇركيا ەلىنىڭ تاجىريبەسى ماڭىزدى.

اباي بايگەنجين،  «ۇلتتىق عىلىمي مەديتسينالىق ورتالىعى» اق باس ديرەكتورى:

- تۇركىتىلدەس ەلدەردىڭ تۇركيادان باسقاسىندا ترانسپلانتولوگيا دامىماعان. ەندى عانا ءبىرىنشى قادامدارىن باستاپ كەلە جاتىر. بىزدە تەك قانا ءبىر عانا كەدەرگى بار. ول - ءوزىمىزدىڭ دارىگەرلەردىڭ دەڭگەيى. قازىر دارىگەرلەرىمىزدى دايارلاپ جاتىرمىز. ويتكەنى ترانسپلانتاتسيا دەگەنىمىز تەك قانا حيرۋرگيالىق پروبلەما ەمەس. يممۋنولوگيا، ىشكى قۇرىلىستاردىڭ جالپى تەراپياسى دەيمىز، بۇل - كوپ سالالى جول.

www.24.kz