استانادا ۇيلەردى جىلىتۋ الداعى 3 جىلدا كۇردەلەنە ءتۇسۋى مۇمكىن
اشىق تالقىعا شىعارىلعان «استانا قالاسىنىڭ تۇرعىن ءۇي قورىن رەنوۆاتسيالاۋ جانە مودەرنيزاتسيالاۋدىڭ 2028 -جىلعا دەيىنگى مەملەكەتتىك باعدارلاماسىندا» وسىنداي دەرەكتەر كەلتىرىلگەن، دەپ حابارلايدى قازاقپارات ءتىلشىسى.
قالا ساعاتىنا 3,1 مىڭ گيگاكالوريا (گ كال) جىلۋ ەنەرگياسىن تۇتىنادى. ءبىراق استانادا ساعاتىنا نەبارى 2,7 مىڭ گ كال جىلۋ وندىرىلەدى. بۇل جىلۋ 28 ميلليون شارشى مەتر تۇرعىن جانە تۇرعىن ەمەس الاڭدارعا تارايدى. سوندا تاپشىلىق ساعاتىنا 350 گ كال-دى قۇراپ وتىر. حالىق سانىنىڭ ارتۋ ديناميكاسىن ەسكەرە وتىرىپ، قالانى قوسىمشا ساعاتىنا 1,5 مىڭ گ كال جىلۋ ەنەرگياسىمەن قامتاماسىز ەتەتىن گاز جىلۋ ستانساسىن سالۋ قاجەت، - دەلىنگەن اشىق ن ق ا پورتالىندا جاريالانعان استاناداعى تۇرعىن ءۇي قورىن رەنوۆاتسيالاۋ جانە مودەرنيزاتسيالاۋ باعدارلاماسىندا.
قۇجاتتا جازىلعانداي، تاپشىلىققا شامادان تىس سالىنىپ جاتقان تۇرعىن ۇيلەر سەبەپ. جىل سايىن ەلوردادا 3 ميلليون شارشى مەتر باسپانا پايدالانۋعا بەرىلەدى. تيىسىنشە ول ينجەنەرلىك ينفراقۇرىلىمعا جۇك ءتۇسىرىپ، جىلۋ، سۋ، ەلەكتر ەنەرگياسى سياقتى رەسۋرستاردىڭ تاپشىلىعىنا اكەلەدى.
تالداۋ كورسەتكەندەي، جىلۋ جۇيەلەرىنىڭ بۇگىنگى قۋاتى جىل سايىن پايدالانۋعا بەرىلەتىن 2 ميلليون شارشى مەتردەن اسپايتىن (قازىر جىل سايىن 3 ميلليون شارشى مەتر) تۇرعىن ءۇي قورىن جىلتۋعا قاۋقارلى. ەلوردادا جىلۋ ەنەرگياسىنىڭ قازىرگى تاپشىلىعى ساعاتىنا 350 گ كال بولسا، وندا الداعى 3 جىلدا تاپشىلىق ساعاتىنا 900 گ كال-عا جەتۋى مۇمكىن، - دەپ ماماندار جاساعان بولجام جازىلعان قۇجاتتا.
قوسا كەتسەك، بۇعان دەيىن ەلورداداعى تۇرعىن ءۇي قورىن رەنوۆاتسيالاۋ جانە مودەرنيزاتسيالاۋ باعدارلاماسى اياسىندا بىرنەشە اۋدانداعى ۇيلەردى تاياۋ ارادا ءسۇرۋ جوسپارلانعانىن جازىپ ەدىك.
سونىمەن بىرگە الداعى 3-5 جىلدا ەلوردا اۋماعىنداعى تۇرعىن ءۇي قۇرىلىسىنىڭ قارقىنىن تومەندەتۋ ۇسىنىلدى.
