دۇنيەجۇزىلىك كوشپەندىلەر ويىنى: قازاقستان 3 «التىن» جەڭىپ الدى

انكارا. قازاقپارات - IV دۇنيەجۇزىلىك كوشپەندىلەر ويىندارىندا قازاق سپورتشىلارى 8 مەدال جەڭىپ الدى، ونىڭ ىشىندە 3 التىن، 3 كۇمىس جانە 2 قولا.

بۇل تۋرالى ق ر مادەنيەت جانە سپورت مينيسترلىگىنەن ءمالىم ەتتى، دەپ حابارلايدى قازاقپارات.

جارىس العاش رەت تۇركيادا ءوتتى، وعان الەمنىڭ 102 مەملەكەتىنەن 3 مىڭنان استام سپورتشى 13 سپورت تۇرىنەن قاتىستى. قازاق سپورتشىلارى سپورتتىڭ 5 تۇرىنەن (قازاق كۇرەسى، كوكپار، كوكبورى، جامبى اتۋ، ساداق اتۋ) ونەر كورسەتتى.

سونىمەن، قازاق كۇرەسىنەن ق ر قۇراماسىنىڭ قورجىنىندا 6 مەدال بار: مارات نىعماتۋللايەۆ 60 كەلىگە دەيىنگى سالماقتا جەڭىمپاز اتاندى. سونداي- اق 65 كەلىگە دەيىنگى ساناتتاعى «التىندى» زارينا ساريپوۆا جەڭىپ الدى. ەلامان قويشىبايەۆ (80 ك گ) پەن راۋزا نۇرمۇحاممەتوۆا (55 ك گ) - كۇمىس، ال «قازاقستان بارىسى» ماقسات يساعابىلوۆ (+80 ك گ) پەن ءمولدىر ازامات (+65 ك گ) قولا جۇلدەگەر اتاندى.

قاسىمحان قانات ءداستۇرلى ساداق اتۋدان فينالدا ونەر كورسەتتى، وندا 32 ەلدەن 95 سپورتشى باق سىنادى. ول ءوزىنىڭ قارسىلاسى وعىز وكشادان 2 ۇپاي ايىرماشىلىعىمەن جەڭىلىپ، كۇمىس جۇلدەگە يە بولدى. تاعى ءبىر كۇمىستى جامبى اتۋدان وتانداسىمىز ەرالحان ايكوز جەڭىپ الدى.

قازاقستان قۇراماسى كوكپاردان چەمپيون اتانىپ، قىرعىزستان كومانداسىن 4:3 ەسەبىمەن ارتتا قالدىردى. فينالعا جەتۋ جولىندا قازاقستاندىقتار وزبەكستان مەن موڭعوليا سپورتشىلارىن 8:1 جانە 12:2 ەسەبىمەن ويسىراتا جەڭگەن بولاتىن.

مينيستر داۋرەن ابايەۆ Facebook-تەگى پاراقشاسىندا كوكپار تۇڭعىش رەت كوشپەندىلەر ويىندارىنىڭ باعدارلاماسىنا ەنگەنىن جانە بۇل جەڭىس بىرەگەي تاريحي وقيعا ەكەنىن اتاپ ءوتتى.