باتىس قازاقستان اۋرۋحاناسىنا 3 رەسەيلىك مامان جۇمىسقا ورنالاسىپ جاتىر

ورال. قازاقپارات – ب ق و جۇقپالى اۋرۋلار اۋرۋحاناسىنا رەسەيلىك ماماندار ورنالاسىپ جاتىر، دەپ حابارلايدى قازاقپارات ءتىلشىسى..

اۋرۋحانا ديرەكتورى ناديا احمەتوۆانىڭ ايتۋىنشا، اتالمىش ەمدەۋ مەكەمەسىنە رەسەيلىك ءۇش مامان جۇمىسقا تۇرماقشى.

ونىڭ سوزىنە قاراعاندا، اۋرۋحاناعا قاجەتتى مامانداردى Telegram جەلىسىندەگى «رەلوكاتسيا مەديكوۆ ۆ كازاحستان» دەگەن توپتان تاپقان.

«ازىرگە قازاقستانعا كەلگەن ەكى دارىگەر قۇجاتتارىن جيناپ، رەتتەپ جاتىر. ولاردىڭ بىرەۋى ەندوسكوپيست بولسا، ەكىنشىسى - ينفەكتسيونيست. ءۇشىنشىسى - باكتەريولوگ. ول ءالى شەكارادا تۇر. ءبىز ولارعا تولىق كەڭەس بەرۋدەمىز. دارىگەرلەر اۋەلى كوشى-قون پوليتسياسىندا تىركەلۋى كەرەك. ارىپتەستەرىمىز قۇرعان ەرىكتىلەر توبى تۇرعىن ءۇي ماسەلەسىن شەشۋگە جاردەمدەسەدى. بارلىق قۇجاتتارى راسىمدەلگەننەن كەيىن زاڭدى نەگىزدە جۇمىسقا الامىز»، دەدى ن. احمەتوۆا.

ب ق و دەنساۋلىق ساقتاۋ باسقارماسى باسپا ءسوز قىزمەتىنىڭ مالىمەتىنە قاراعاندا، وڭىردە 271 دارىگەر جەتىسپەيدى.

ەسكە سالا كەتەيىك، بۇدان بۇرىن باتىس قازاقستاندا 113 تۇلەكتىڭ اكىمدىك گرانتىنىڭ يەگەرى اتانعانىن جازعان بولاتىنبىز.

سونىڭ ىشىندە 56 گرانت دارىگەرلىك ماماندىقتى تاڭداعان جاستارعا بەرىلدى.

ەسكە سالا كەتەيىك، بۇدان بۇرىن رەسەيمەن شەكاراداعى احۋال تولىق باقىلاۋدا ەكەندىگىن جازعان بولاتىنبىز.