قىتاي اتىنان وليمپياداعا قاتىسىپ جاتقان 3 قازاق سپورتشىنىڭ ناتيجەلەرى قانداي

نۇر- سۇلتان. قازاقپارات - بەيجىڭدەگى XXIV قىسقى وليمپيادا ويىندارىندا قىتاي اتىنان ءۇش قانداسىمىز قاتىسۋدا، دەپ حابارلايدى قازاقپارات.

ناقتىراق ايتساق، كونكي سپورتىنان - اقنار اداق، شاڭعى سپورتىنان - بايان جالىن جانە قادىس بەدەلحان سىنعا ءتۇستى.

كونكيشى اقنار اداق - شىنجاڭ ولكەسى، قۇتىبي اۋدانىندا دۇنيەگە كەلگەن. بۇعان دەيىن 2019 -جىلعى قىتاي بىرىنشىلىگىنىڭ 5000 مەترلىك جارىسىندا - «التىن»، 3000 مەتردە - كۇمىس مەدال العان. حالىقارالىق جارىستارعا دا قاتىسىپ، جۇلدەگەرلەر قاتارىنان كورىنىپ ءجۇر. 2016 -جىلى قىتايدىڭ ۇلتتىق قۇراماسىنا قابىلدانعان. ول وسى وليمپيادا ويىندارىندا 3 قاشىقتىقتا سىنعا تۇسەدى.

5 - اقپاندا 3000 مەترلىكتە سايىسىپ، 17-ورىنعا يە بولدى.

ايتا كەتسەك، بۇل قاشىقتىقتا قازاقستاندىق كونكيشى نادەجدا موروزوۆا جارىستى 13-ورىنمەن اياقتاعان بولاتىن. اقنار اداق الداعى كۇندەرى 1500 جانە 5000 مەتر قاشىقتىقتا تاعى دا مۇزايدىنعا شىعادى.

شاڭعىشى بايان جالىن قىزى - شىڭجاڭ ولكەسى، التاي ايماعى، جەمەنەي اۋدانىندا دۇنيەگە كەلگەن. ۇلتى - قازاق. قىتاي بىرىنشىلىكتەرىنىڭ جارىستارىنا قاتىسىپ، بىرنەشە مارتە جەڭىمپاز اتانعان. 2020 -جىلى درەزدەندە (گەرمانيا) وتكەن الەم كۋبوگىندا 9-ورىن العان. كەيىن قىتاي ۇلتتىق قۇراماسىنىڭ مۇشەلىگىنە وتكەن. ول بەيجىڭ وليمپياداسىندا 15 شاقىرىمدىق سكياتلون فينالىنا قاتىسىپ، 46-ورىنعا يە بولدى. ال بۇل سىندا ەلىمىزدىڭ نامىسىن قورعاعان شاڭعىشىلارىمىز كسەنيا شالىگينا 48-ءشى، انگەلينا شۋرىگا 49-شى، ۆالەريا تيۋلەنيەۆا 51- ءشى جانە نادەجدا ستەپاشكينا 58- ءشى ورىننان كورىندى.

تاعى ءبىر شاڭعىشى قانداسىمىز قادىس بەدەلحان شىڭجاڭ ولكەسى، سانجى وبىلىسىندا دۇنيەگە كەلگەن. قىتاي بىرىنشىلىگىنىڭ جەڭىمپازى. 2017 -جىلدان بەرى قىتاي ۇلتتىق قۇراماسىنىڭ ۇزدىك سپورتشىلارىنىڭ ءبىرى سانالادى. ول بەيجىڭ وليمپيداسىندا ەرلەر اراسىندا وتكەن 30 شاقىرىمدىق سكياتلون جارىسىندا مارە سىزىعىن 50- بولىپ كەستى. ال قازاقستان اتىنان بۇل سىنعا ەكى شاڭعىشى تۇسكەن بولاتىن. ۆيتاليي پۋحكالوۆ ءتورت جىل بۇرىنعى ناتيجەسىن قايتالاپ، 32- ورىنعا تۇراقتادى. ول جەڭىمپازدان 7 مينۋت 35 سەكۋندقا قالىپ قويدى. ەكىنشى سپورتشىمىز ەۆگەنيي ۆەليچكو جارىستى اياقتاي العان جوق.

ەسكە سالساق، بەيجىڭدەگى قىسقى وليمپيادا ويىندارىنا قاتىساتىن قىتاي قۇراماسىنىڭ ەسىمدەرى جاريالاندى. ولاردىڭ قاتارىندا 3 قازاق سپورتشىسى بار.

اۆتور: كۇنسۇلتان وتارباي