داۋرەن ابايەۆ تاۋەلسىزدىكتىڭ 3 نەگىزگى جەتىستىگىن اتادى
«تاۋەلسىزدىكتىڭ 30 جىلدىعىن كۇردەلى كەزەڭدە اتاپ وتكەنىمىزدى بىلەسىز. پاندەميا ءالى باسىلعان جوق. ونسىز دا ەكونوميكاعا، ازاماتتاردىڭ الەۋمەتتىك تۇرمىسىنا دا قاتتى اسەر ەتكەن بولاتىن. نەسىن جاسىرامىز، جالپى وپتيميزيم دەڭگەيىنە اۋىر سوققى بولدى. مۇنداي ساتتەردە قاراپايىم ادامي وكىنىشتەردى تۇسىنۋگە بولادى. سىناپ- مىنەۋگە، نيگيليزمگە ۇرىنۋ وڭاي مۇندايدا. ءبىراق بۇل ادىلەتسىز. ءبىز قالىپتاسقان مەملەكەت قۇرا الدىق. 30 جىلدىڭ ىشىندە دامۋ جولىندا ۇلكەن قادام جاسادىق. بۇل جەردە ءۇش فۋندامەنتالدى قورىتىندىنى ءبولىپ ايتۋعا بولادى دەپ ويلايمىن. ءبىرىنشى، ءبىز بىرلىك پەن كەلىسىمدى ساقتاي الدىق. بۇل تۋرالى كوپ ايتىلىپ ءجۇر عوي. ول دۇرىس تا. ءبىز ءاردايىم جۇدىرىقتاي جۇمىلساق قانا دامۋعا قابىلەتتى بولاتىنىمىزدى ەستە ساقتاۋىمىز كەرەك. قاقتىعىستاردىڭ، كەمسىتۋ مەن ءبولىنۋدىڭ اپاراتىن جەرى بەلگىلى»، - دەدى ول «اشىق ديالوگ» سۇحباتىندا.
ايتۋىنشا، ەكىنشى فۋندامەنتالدى جەتىستىك - ازاماتتارعا دەگەن قامقورلىق.
«الەۋمەتتىك ساياساتىمىزدى سىناي بەرۋگە بولادى. ءبىراق بىزدەگىدەي الەۋمەتتىك پاكەتى اۋقىمدى ەلدەردى ساۋساقپەن ساناپ الۋعا بولادى. ءبىز اتاۋلى الەۋمەتتىك كومەك تە بەرىپ وتىرمىز. بىزدە بازالىق مەديتسينا اقىسىز. جوعارى وقۋ ورىندارىنا گرانتتار ءبولىنىپ كەلەدى. كوللەدجدەرگە ءتۇسۋ تەگىن. بىزدە جەڭىلدىكپەن تۇرعىن ءۇي نەسيەسىن الۋعا بولادى. وسىنداي كوپتەگەن شارالار بار. ءۇشىنشىسى - رەفورماتورلىق رۋح. كوپتەگەن ولشەمدەر بويىنشا ءبىز ت م د ەلدەرىنىڭ اراسىندا ءبىرىنشى ورىندامىز. ءبىز ءتۇرلى راديكالدى رەفورمالاردى ءبىرىنشى بولىپ جۇرگىزدىك. تارتىمدى ينۆەستيتسيالىق كليمات قالىپتاستىردىق. تۇسىنىكتى زەينەتاقى رەفورماسىن دا ءبىرىنشى ءبىز جۇرگىزدىك. ەلەكتروندى ۇكىمەتتى دە ءبىرىنشى بولىپ قۇردىق. يەن دالادا قالا سالىپ ۇيرەندىك»، - دەگەن پرەزيدەنت اكىمشىلىگى باسشىسىنىڭ ءبىرىنشى ورىنباسارى قازاقستاندىق گاندبولشىلاردىڭ كوپشىلىكتى سۇيسىنتكەن ۆيدەوسىن ەسكە الدى.
«تاۋەلسىزدىكتىڭ ارقاسىندا ءبىز باتىل، تالاپتى، پاتريوت جاس بۋىن تاربيەلەي الدىق. مىسال ىزدەسەك، الىسقا بارىپ قاجەتى جوق. جۋىقتا عانا يسپانياداعى گاندبولدان وتكەن الەم چەميپيوناتىندا ءبىزدىڭ قىزدار ەسكى گيمندى قوسقان كەزدە ابدىراپ قالماي، قازىرگى مەملەكەتتىك ءانۇراندى اكاپەللو ستيلىندە شىرقاپ بەردى. بۇل سونداي ءبىر مەگا ەرلىك ەمەس شىعار. ءبىراق جاستاردىڭ ءوز ەلىن ماقتان تۇتاتىنىن، ونىڭ ابىرويى ءۇشىن كۇرەسۋگە دايىن ەكەنىن كورسەتىپ بەردى»، - دەدى داۋرەن ابايەۆ.
اۆتور: ەسىمجان ناقتىباي
