ءىرى بيزنەس سۋبەكتىلەرىنەن مەملەكەتتىك بيۋدجەتكە 3 تريلليون تەڭگە ءتۇستى
بۇل تۋرالى مەملەكەتتىك كىرىستەر كوميتەتى ءىرى سالىق تولەۋشىلەر دەپارتامەنتىنىڭ ديرەكتورى انۋار سۇلەيمەنوۆ ايتتى، دەپ حابارلايدى قازاقپارات ءتىلشىسى.
«مونيتورينگتە تۇرعان 343 سالىق تولەۋشى ءىرى بيزنەس سۋبەكتىلەرى سانالادى. ونىڭ ىشىندە 99-ى - جەر قويناۋىن پايدالانۋشىلار، 244- ء ى - ەكونوميكانىڭ ءار ءتۇرلى سەكتورلارىنداعى ءىرى سالىق تولەۋشىلەر. ولارعا مەملەكەتتىك بيۋدجەتكە 44 پايىز جانە رەسپۋبليكالىق بيۋدجەتكە 51 پايىزدان استام سالىق تۇسىمدەر تيەسىلى. ماسەلەن، وسى جىلدىڭ 9 ايىنىڭ قورىتىندىسىندا ءىرى بيزنەس سۋبەكتىلەرىنەن مەملەكەتتىك بيۋدجەتكە تۇسەتىن تۇسىمدەر 1270 ميلليارد تەڭگەگە نەمەسە 36 پايىزعا ۇلعايىپ، 3302,3 ميلليارد تەڭگە بولدى»، - دەدى دەپارتامەنت ديرەكتورى ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
ونىڭ دەرەگىنشە، رەسپۋبليكالىق بيۋدجەتكە تۇسىمدەر 840,1 ميلليارد تەڭگەگە نەمەسە 50 پايىزعا ۇلعايىپ، 2520,7 ميلليارد تەڭگە بولدى. كوتەرمە جانە بولشەك ساۋدا 26 پايىزعا نەمەسە 274,8 ميلليارد تەڭگەگە؛ وڭدەۋ ونەركاسىبى 17,4 پايىزعا نەمەسە 184,8 ميلليارد تەڭگەگە؛ قارجى جانە ساقتاندىرۋ قىزمەتى، جىلجىمايتىن مۇلىكپەن وپەراتسيالار 14,2 پايىزعا نەمەسە 151 ميلليارد تەڭگەگە؛ قۇبىرجولى ارقىلى تاسىمالداۋ 38,7 پايىزعا نەمەسە 33 ميلليارد تەڭگەگە ءوستى.
«تۇسىمدەردىڭ ۇلعايۋى پاندەميادان كەيىن ەكونوميكانى قالپىنا كەلتىرۋ جانە سالىقتىق اكىمشىلەندىرۋ ساپاسىن جاقسارتۋ كەزەڭىنە كەلدى. اكىمشىلەندىرۋ ساپاسىنىڭ جاقسارۋىنا تاۋەكەلدەردى باعالاۋ جۇيەسى اقپاراتتىق جۇيەسىن پايدالانا وتىرىپ، سالىقتىق تەكسەرۋلەردى تاعايىنداۋ اسەر ەتتى. وسى جۇيەنى قولدانۋ تاۋەكەل دارەجەسىن باعالاۋ كورسەتكىشتەرى نەگىزىندە سالىقتىق تەكسەرۋلەر ءۇشىن ءىرى بيزنەس سۋبەكتىلەرىن ناقتى ىرىكتەۋگە مۇمكىندىك بەردى. وندا تەكسەرۋلەر تاۋەكەلدىڭ جوعارى دارەجەسىنە جاتقىزىلعان سالىق تولەۋشىلەرگە قاتىستى تاعايىندالادى. جالپى، 2021 -جىلعى 9 ايدا ءىرى سالىق تولەۋشىلەردى 34 سالىقتىق تەكسەرۋ اياقتالدى. جۇرگىزىلگەن تەكسەرۋلەردىڭ ناتيجەسى بويىنشا 46,5 ميلليارد تەڭگە سالىقتار مەن ءوسىمپۇلدار قوسا ەسەپتەلدى»، - دەدى انۋار سۇلەيمەنوۆ.
اۆتور: مارلان جيەمباي