3-قىركۇيەك. قازاقپارات كۇنتىزبەسى
ەستە قالار وقيعالار
1998 -جىلى قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ جارلىعىمەن الماتى وبلىسى قاسكەلەڭ اۋدانىنىڭ اتاۋى قاراساي اۋدانى بولىپ وزگەردى.
2007 -جىلى قازاقستان تاريحىندا تۇڭعىش رەت ەلباسى نۇرسۇلتان نازاربايەۆ بارلىق قازاقستاندىق وقۋشىلار ءۇشىن «جاڭا قازاقستان - جاڭا الەمدە» ينتەراكتيۆتى ساباعىن وتكىزدى. On-line رەجيمىندە وتكەن ساباققا رەسپۋبليكا بويىنشا مىڭداعان وقۋشىلار قاتىستى.
2009 -جىلى قازاقستان رەسپۋبليكاسى پرەزيدەنتىنىڭ جارلىعىمەن اقمولا وبلىسىنىڭ شۋچە اۋدانى بۋراباي اۋدانى دەپ وزگەرتىلدى.
2010 -جىلى «ەۋروسپورت» تەلەارناسى قازاقستاننىڭ تابىستى جاس سپورتشىلارى تۋرالى «جاس ءۇمىت» تەلەجوباسىن ىسكە قوستى. ونىڭ ماقساتى - قازاقستاننىڭ سپورتتىق الەۋەتىن كورسەتۋ، سونىمەن قاتار سيكلدى باعدارلامالار ارقىلى وسى ەلدىڭ مادەنيەتى مەن قۇندىلىقتارى جونىندە ماعلۇمات بەرۋ.
2012 -جىلى نازاربايەۆ ۋنيۆەرسيتەتىندە قازاقستان پرەزيدەنتى ينتەراكتيۆتى ءدارىس وقىدى. لەكسيانىڭ الدىندا نۇرسۇلتان نازاربايەۆ جاڭا «ءبىلىم» تەلەارناسىن ىسكە قوستى. ارنادان ءدارىس تىكەلەي ەفيردە كورسەتىلدى. ەلباسى دارىستەن كەيىن ينتەراكتيۆتى رەجيمدە تىڭدارماندار سۇراقتارىنا جاۋاپ بەردى.
2012 -جىلى ەسسەنتۋكي كاۆكاز مينەرالدى سۋلارى توبىنا كىرەتىن رەسەيدەگى ەڭ ءىرى جانە تانىمال ەمدىك سۋى مەن بالشىقپەن ەمدەيتىن كۋرورتىندا تولىق جاڭارتىلعان «قازاقستان» ساناتوريى دەمالۋشىلار ءۇشىن ەسىگىن اشتى.
2013 -جىلى قازاقستان حالىق سۋرەتشىسى اۋباكىر ىسمايىلوۆتىڭ ءجۇز جىلدىعىنا وراي ءۇش تىلدە (قازاق، ورىس، اعىلشىن) «الەم كوشپەندى بوياۋىندا» اتتى كىتاپ- البومى جارىق كوردى. بۇدان بولەك، سۋرەتشى وتباسىنىڭ نۇسقاۋىمەن رەسەيلىك ساراپشىلاردى تارتا وتىرىپ، دەرەكتى فيلم ءتۇسىرىلدى. 30 مينۋتتىق فيلمدە قىلقالام شەبەرىنىڭ تاعدىرى، ونەر جولى ءسوز بولدى.