تاۋەلسىزدىك ۇرپاقتارى: جاستارعا 3 ميلليون تەڭگەدەن گرانت بەرىلەدى

نۇر-سۇلتان. قازاقپارات - 19- شىلدەدەن 20-قىركۇيەككە دەيىن «تاۋەلسىزدىك ۇرپاقتارى» گرانتىنا وتىنىمدەر قابىلدانادى، دەپ حابارلايدى قازاقپارات ءتىلشىسى.

بۇل تۋرالى ق ر اقپارات جانە قوعامدىق دامۋ مينيسترلىگى جاستار جانە وتباسى ىستەرى كوميتەتىنىڭ ءتوراعاسى شاحماردان بايمانوۆ ورتالىق كوممۋنيكاتسيالار قىزمەتىندە ايتىپ بەردى.

«تاۋەلسىزدىك رۋحىمەن ءوسىپ كەلە جاتقان بۇگىنگى تاۋەلسىزدىك ۇرپاقتارى - ءبىزدىڭ ەرتەڭگى ءۇمىتىمىز، سەنىمدى تىرەگىمىز. 30 جىلدىق تاريحى بار تاۋەلسىز قازاقستاننىڭ مەملەكەتتىك ساياساتىنىڭ نەگىزگى باسىمدىعى دا - جاستاردى قولداۋ جانە ادامي كاپيتالدى دامىتۋ بولىپ سانالادى. بۇگىندە ەلىمىزدەگى تاۋەلسىزدىك ۇرپاقتارى 3,8 ميلليون نەمەسە ەل حالقىنىڭ %20 ىن قۇرايدى»، - دەدى ش. بايمانوۆ.

ەل پرەزيدەنتى ق. ك. توقايەۆ «تاۋەلسىزدىك بارىنەن قىمبات» ماقالاسىندا تاۋەلسىزدىك جىلدارى دۇنيەگە كەلگەن دارىندى جاستارعا ناقتى قولداۋ رەتىندە «تاۋەلسىزدىك ۇرپاقتارى» اتتى گرانت تاعايىنداۋ قاجەتتىگىن اتاپ وتكەن. وسىعان وراي، مينيسترلىك 2021-جىلدىڭ 8- شىلدەسىندە ۇكىمەت قاۋلىسىمەن «تاۋەلسىزدىك ۇرپاقتارى» گرانتىن تاعايىنداۋ بويىنشا ەرەجەلەرى مەن تۇجىرىمداماسىن بەكىتتى.

«بيىل العاش رەت تاۋەلسىزدىكتىڭ 30 جىلدىعىنا وراي، ۇزدىك 30 جوباعا 3 ميلليون تەڭگەدەن «تاۋەلسىزدىك ۇرپاقتارى» اتتى گرانت بەرىلەدى. ەلىمىزدىڭ 14-29 جاس ارالىعىنداعى بارلىق ازاماتتارىنا ارنالعان گرانتتىڭ نەگىزگى ماقساتى - بەلسەندى شىعارماشىل جاستاردىڭ جوبالارىن، باستامالارىن ىسكە اسىرۋ، قولدا بار جوبالاردى دامىتۋ، عىلىمي جانە قولدانبالى زەرتتەۋلەر جۇرگىزۋ جانە جاستاردى وقىتۋ ءۇشىن پايدالانۋعا بەرۋ بولادى»، - دەيدى ش. بايمانوۆ.

ايتا كەتەيىك، گرانتتار ق ر ازاماتتارىنا جاڭا يدەيالار مەن باستامالاردى ىسكە اسىرۋ ءۇشىن كەلەسى باعىتتار بويىنشا كونكۋرستىق نەگىزدە بەرىلەدى:

«عىلىم» - عىلىمنىڭ باسىم سەكتورلارىندا جاڭا عىلىمي جوبالار مەن زەرتتەۋلەردى ىسكە اسىرۋ ءۇشىن؛

«مادەنيەت» - قازاقستاننىڭ مادەني مۇراسىن تانىمال ەتۋگە، حالىقتىق مادەني داستۇرلەر مەن ونەردى ىلگەرىلەتۋگە باعىتتالعان جوبالاردى ىسكە اسىرۋ ءۇشىن؛

«اقپاراتتىق تەحنولوگيالار» - جاڭا IT- شەشىمدەر مەن جوبالاردى، ونىڭ ىشىندە باستاۋشى ستارتاپ-جوبالاردى ىسكە اسىرۋ جانە ازىرلەۋ ءۇشىن؛

«بيزنەس» - ەكونوميكانىڭ باسىم سەكتورلارىندا جاڭا بيزنەس-يدەيالاردى ىسكە اسىرۋ ءۇشىن؛

«مەديا» - جاڭا مەديا-جوبالاردى، ونىڭ ىشىندە جاستار ءۇشىن تانىمدىق، پايدالى، قىزىقتى كونتەنتتى قۇرۋ جونىندەگى جوبالاردى ىسكە اسىرۋ ءۇشىن.

كونكۋرستىق وتىنىمدەر مەملەكەتتىك نەمەسە ورىس تىلدەرىندە قابىلدانادى جانە وندا تومەندەگى مالىمەت بولۋى قاجەت:

جوبانىڭ سيپاتتاماسى؛

جوبانىڭ بەينەپرەزەنتاتسياسى (60 سەكۋندتان كوپ ەمەس)؛

شىعىندار سمەتاسىنىڭ جوباسى؛

زياتكەرلىك مەنشىك تۋرالى مالىمەتتەر (بار بولسا).