ۇلىتاۋداعى دالا ءورتى: 3 اۋىلدا توتەنشە جاعداي جاريالاندى

ۇلىتاۋ. قازاقپارات - دالا ءورتىنىڭ ورشۋىنە بايلانىستى ۇلىتاۋ اۋدانىنىڭ ءۇش اۋىلدىق - جانگەلدى، اقتاستى، امانگەلدى وكرۋگىندە توتەنشە جاعداي رەجيمى جاريالاندى، دەپ حابارلايدى قازاقپارات ءتىلشىسى.

وبلىستىڭ ۇلىتاۋ، قارقارالى، وساكاروۆ، بۇقار جىراۋ، شەت، نۇرا اۋداندارى مەن قاراجال قالاسىنىڭ اۋماعىندا 17 دالا ءورتى تىركەلدى. قازىرگى كەزدە 17 دالا ءورتىنىڭ 10 ى ءسوندىرىلدى.

ونىڭ ۇشەۋى ۇلىتاۋ اۋدانىنىڭ اۋماعىندا، ەكەۋى بۇقار جىراۋ اۋدانىنىڭ اۋماعىندا، بىرەۋى شەت اۋدانىندا، ەكەۋى نۇرا اۋدانىندا، بىرەۋى وساكاروۆ اۋدانىندا جانە بىرەۋى قارقارالى اۋدانىنىڭ اۋماعىندا.

تابيعي ءورت وشاقتارىن ءسوندىرۋ ءۇشىن «قازاۆيا قۇتقارۋ» ا ق «م ي-8» تىكۇشاعى جىبەرىلدى.

سونداي-اق ءورت ءسوندىرۋ جۇمىستارىن كۇشەيتۋ ءۇشىن قاراعاندىدان 40 ادام جانە ءۇش بىرلىك تەحنيكا (ەكى ۆاحتوۆكا جانە كوماندالىق- شتابتىق ماشينا) شىقتى.

جاڭاارقا كەنتىنەن 10 توننالىق اۆتوتسيستەرنا جىبەرىلدى. سونىمەن قاتار ۇلىتاۋ اۋدانى قوسكول اۋىلىنان ەر ادامنىڭ ورتەنگەن دەنەسى تابىلدى.

«4- شىلدەدە ۇلىتاۋ اۋدانى قوسكول اۋىلىنان سولتۇستىك-باتىسقا قاراي 40 كيلومەتر جەردە 1998-جىلى تۋعان ەر ادامنىڭ ورتەنگەن دەنەسى تابىلدى. كوز جۇمعان ادام ەرىكتى ءورت قۇرامى قاتارىندا بولماعان جانە دالا ورتتەرىن سوندىرۋگە تارتىلماعان. وقيعاعا قاتىستى تەكسەرۋ جۇرگىزىلۋدە»، - دەدى قاراعاندى وبلىسىنىڭ ت ج د باسپا ءسوز قىزمەتى.