كوروناۆيرۋسقا بايلانىستى احۋال: قازاقستان وڭىرلەرى 3 توپقا ءبولىندى

نۇر- سۇلتان. قازاقپارات - ءبىر اپتا ىشىندە كوروناۆيرۋسقا شالدىققانداردىڭ 14 پايىزى ىندەتتى شەت ەلدەردەن جۇقتىرىپ كەلگەن. بۇل تۋرالى ق ر د س م تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنىڭ ءتوراعاسى تيمۋر سۇلتانعازيەۆ ايتتى، دەپ حابارلايدى قازاقپارات ءتىلشىسى.

«ءبىر اپتا ىشىندە تىركەلگەن كوروناۆيرۋس جۇقتىرۋ جاعدايلارىنىڭ 14 پايىزى - سىرتتان كەلگەن. ۆيرۋس نەگىزىنەن رەسەي فەدەراتسياسىنان كەلىپ جاتىر. وزبەكستان مەن قىرعىزستاننان دا ازداعان دەرەكتەر بار» ، - دەدى ول «دەنساۋلىق مينيسترلىگى حابارلايدى.. .» باعدارلاماسى بارىسىندا.

ونىڭ اتاپ وتۋىنشە، كوروناۆيرۋسقا قاتىستى ەلىمىزدىڭ وڭىرلەرى 3 توپقا بولىنگەن. «ءبىرىنشى توپقا اپتا ىشىندەگى ۆيرۋس جۇقتىرۋ جاعدايىنىڭ ءوسىمى 7 پايىزدان اساتىن وڭىرلەر كىرەدى. ولاردىڭ قاتارىندا اقمولا، اقتوبە، قوستاناي، تۇركىستان جانە جامبىل وبلىستارى بار. ەكىنشى توپقا COVID-19 بويىنشا ەپيدەميولوگيالىق جاعداي 7 پايىزدان كەم وڭىرلەر كىرەدى. ولار: الماتى، پاۆلودار، سولتۇستىك قازاقستان، قاراعاندى وبلىستارى، نۇر- سۇلتان جانە الماتى قالالارى. بۇل وڭىرلەردە 7 كۇننىڭ ىشىندە 553 جاعداي تىركەلدى. ءۇشىنشى توپ ۆيرۋسقا شالدىعۋ ءوسىمى 5 پايىزدان اسپايتىن - شىعىس قازاقستان، قىزىلوردا جانە ماڭعىستاۋ وبلىستارى كىرەدى» ، - دەدى كوميتەت باسشىسى.