تۇركىستان قالاسى 3 ايماق بويىنشا دامىتىلادى
بۇل تۋرالى بۇگىن تۇركىستان وبلىسىنىڭ اكىمى جانسەيىت تۇيمەبايەۆ ق ر ورتالىق كوممۋنيكاتسيا قىزمەتى ۇيىمداستىرعان كوشپەلى بريفينگتە ايتتى، دەپ حابارلايدى قازاقپارات.
اكىمدىك تاراتقان حابارلاماعا قاراعاندا، تاريحي كيەلى ايماق - 89 گەكتار؛ قۇرىلىس سالۋدى رەتتەۋ ايماعى - 98 گەكتار؛ اكىمشىلىك-ىسكەرلىك ورتالىعى - 700 گەكتار اۋماقتا ورنالاسقان.
ايماق باسشىسى بايانداماسىندا 3 اۋماق بويىنشا بوي كوتەرەتىن عيماراتتاردى اتاپ ءوتتى.
«ءبىرىنشى ايماق: تۇركىستان قالاسىنداعى تاريحي كيەلى ايماقتا ورنالاسقان ح. ا. ياساۋي كەسەنەسىنىڭ اۋماعىنداعى 89 گەكتار جەر تەلىمىنە امفيتەاتر، سۋ بۇرقاقتارى، مادەني دەمالىس ورىندارى، ۆيزيت ورتالىعى جانە اشىق اسپان استىنداعى مۇراجاي عيماراتتارى بوي كوتەرەتىن بولادى.
ەكىنشى ايماق: قۇرىلىس جۇمىستارىن رەتتەۋ ايماعىنا «قازاقستان-نازاربايەۆ» ورتالىعى، «قازاق حاندارى، بيلەرى» ورتالىعى، شىعىس مونشاسى، «ۇلى دالا ەلى» ورتالىعى، تۇركى الەمىنىڭ ورتالىعى، ح. ا. ياساۋي ورتالىعى، استانا ساياباعى، بەينەلەۋ-ونەر مۇراجايى جانە تاريحي- مادەني ورىندار ورتالىعىنىڭ عيماراتتارى سالىنادى.
ءۇشىنشى ايماق: اكىمشىلىك ىسكەرلىك ورتالىعىن دامۋى ايماعىندا 700 گەكتار جەر تەلىمىن 3 كەزەڭگە ءبولىپ قاراستىرىلۋدا»، - دەدى جانسەيىت قانسەيىت ۇلى.
قازىرگى تاڭدا، تۇركىستان قالاسىن تۇركى الەمىنىڭ مادەني-رۋحاني ورتالىعى رەتىندە دامىتۋدىڭ باس جوسپارى تۇجىرىمداماسىن ازىرلەۋ ماقساتىندا كونكۋرس ۇيىمداستىرلىپ، وتكىزىلدى.
بارلىعى 22 جوبا جولدانسا، ونىڭ 15 ءى زاڭدى تۇلعالار جانە 7 ءى جەكە تۇلعالار كونكۋرسقا قاتىستى. سونىڭ ىشىندە، تۇركيادان-2، كورەيا ەلىنەن-2، وسكەمەن قالاسىنان-1، الماتى قالاسىنان-6، استانا قالاسىنان-6، شىمكەنت قالاسىنان-4، تۇركىستان قالاسىنان-1.
مەملەكەتتىك كوميسسيانىڭ شەشىمىنە سايكەس، 2018-جىلدىڭ 29- قىركۇيەك كۇنى ەلباسىنىڭ تۇركىستان وبلىسىنا ءىس-ساپار بارىسىندا تۇركىستان قالاسىن تۇركى الەمىنىڭ مادەني-رۋحاني ورتالىعى رەتىندە دامىتۋ جونىندەگى باس جوسپاردىڭ تۇجىرىمداماسىن ماقۇلداۋ تۋرالى ق ر پرەزيدەنتىنىڭ جارلىعى جارىق كوردى.
ايتا كەتسەك، قالانىڭ اۋماعىن دامىتۋدىڭ جالپى اۋدان پەرسپەكتيۆاسىندا 500 مىڭ ادامدى قۇرايتىن حالىقتىڭ سانى ءۇشىن 25000 گەكتار جەر كولەمى قاجەت ەتەدى. قالانىڭ جاڭا قۇرىلىسىنىڭ ساۋلەت ءستيلى جەرگىلىكتى ۇلتتىق سالت-داستۇرگە سۇيەنەتىن بولادى. جوسپارلاۋ قۇرىلىمىنىڭ نەگىزگى قاعيداتى قالانىڭ بارلىق تۇسىنان كورىنۋگە ءتيىس قوجا احمەت ياساۋي كەسەنەسى بولىپ تابىلادى.
