18:49, 23 - ءساۋىر 2018 | GMT +5
ەلوردادا 3 ءسابي تەرەزەدەن قۇلاپ كەتتى
استانا. قازاقپارات - سوڭعى بەس كۇننىڭ ىشىندە استاناداعى كوپ قاباتتى ۇيلەردىڭ تەرەزەلەرىنەن 3 بالانىڭ قۇلاۋ وقيعالارى تىركەلدى، دەپ حابارلايدى قازاقپارات ءتىلشىسى.
«جىل سايىن كۇن جىلىنا باستاعان مەزگىلدە بالالاردىڭ تەرەزەدەن قۇلاۋ وقيعالارى جيىلەپ كەتەدى. قالالىق iKomek مونيتورينگ جانە جادەل ارەكەت ەتۋ ورتالىعىنىڭ مالىمەتىنشە، سوڭعى بەس كۇننىڭ ىشىندە 3 مارتە بالا قۇلاۋ وقيعاسى تىركەلدى»، - دەپ جازىلعان ورتالىقتىڭ فەيسبۋك پاراقشاسىندا.
ەكى وقيعا 18 - ءساۋىر كۇنى تىركەلگەن. 2014 -جىلى تۋىلعان ەكى بالا 10 شى جانە 2- قاباتتان قۇلاعان. 10- قاباتتان قۇلاعان بالانى قۇتقارۋعا مۇمكىندىك بولعان جوق. ەكىنشى قاباتتان قۇلاعان ءبۇلدىرشىن ءارتۇرلى دەنە جاراقاتىن العان. ءۇشىنشى وقيعا كەشە، 23 - ءساۋىر كۇنى بولعان. 5 جاسار ۇل بالا ءۇشىنشى قاباتتان قۇلاپ، كوپتەگەن دەنە جاراقاتتارىمەن اۋرۋحاناعا جەتكىزىلدى.
اتالعان ورتالىق، سابيلەردى قاراۋسىز قالدىرماۋعا، بارىنشا اباي بولۋعا شاقىرادى.
