وسكەمەندە قۇراستىرىلعان 3 مىڭعا جۋىق اۆتوكولىك قىتايعا ەكسپورتتالادى
قازاقستان - قىتاي شەكاراسىنان وتەردە كولىك باعالارىنىڭ قىمباتتايتىنىنا قاراماستان، شىعىستاعى كورشى مەملەكەت قازاقستاندىق اۆتوكولىكتەرگە زور قىزىعۋشىلىق تانىتىپ وتىر، دەپ حابارلايدى «قازاقپارات» ح ا ا ءتىلشىسى.
بۇل تۋرالى بۇگىن و ك ق بريفينگىندە «قازاۆتوءوندىرىس» قازاقستان اۆتوموبيل سالاسى كاسىپورىندارى وداعىنىڭ» باسقارما ءتوراعاسى ولەگ الفەروۆ ءمالىم ەتتى.
«قازاقستان شەكاراسىنان قىتايعا وتكىزەر كەزدە اۆتوكولىكتەردىڭ قىمباتتايتىنىنا قاراماستان، سۇرانىس ارتىپ كەلەدى. ىشكى نارىقتا، ماسەلەن، 3 ميلليون تەڭگەگە ساتىلاتىن اۆتوكولىك قىتايدا 4,4 ميلليون تەڭگە تۇرۋى مۇمكىن. وسىعان قاراماستان وسكەمەندىك «ازيا اۆتو» اق جىلدىڭ سوڭىنا دەيىن قىتايلىق نارىققا 3 مىڭعا اۆتوكولىك وتكىزۋدى جوسپارلاپ وتىر»، - دەيدى ولەگ الفەروۆ.
باسقارما ءتوراعاسىنىڭ سوزىنە سۇيەنسەك، وتكەن اپتادا عانا «KAZAKH INVEST» ۇلتتىق كومپانياسىنىڭ وكىلدەرى مەن وسكەمەندەگى اۆتوكولىك ءوندىرۋشى كاسىپورىن باسشىسى بەيجىڭگە بارىپ، سول جاقتاعى مەملەكەتتىك ورگاندارمەن سەرتيفيكات الۋ جانە ليتسەنزيالاۋ ماسەلەسىن تالقىلاعان.
كەزدەسۋدە تاسىمال جۇرگىزۋ ماسەلەلەرى كەلىسىلگەن. قىتايدا سەرتيفيكات الۋ جۇمىسى مەن وزگە دە اكىمشىلىك كەدەرگىلەر جەتەرلىك. ەۋرازيالىق ەكونوميكالىق وداق ەلدەرى اراسىندا يمپورتتىق تاريف 30 پروتسەنت بولسا، قىتايدا بۇل كورسەتكىش 66 پروتسەنتكە دەيىن جەتكەن. سوعان قاراماستان، قازاقستاندىق تاراپ بۇل كەدەرگىلەردى ەڭسەردى دەسە دە بولادى»، - دەيدى باسقارما ءتوراعاسى.
ەكسپورتقا «Lada» اۆتوكولىگىنىڭ كلاسسيكالىق مودەلدەرى عانا ەمەس، وسكەمەندە قۇراستىرىلاتىن كولىكتەردىڭ وزگە تۇرلەرى شىعارىلماق. ولەگ الفەروۆ سونىمەن بىرگە، بيىل قازاقستاندا «KIA»، «Chevrolet»، «Ravon» سىندى اۆتوكولىك مودەلدەرىنىڭ بىرنەشە تۇرلەرى قۇراستىرىلا باستاعانىن حابارلايدى.
«اۆتوكولىك مودەلدەرىنىڭ قوسىمشا تۇرلەرىنىڭ قۇراستىرىلا باستاعانى قازاقستاندىقتاردىڭ تاڭداۋ مۇمكىندىگىن ارتتىرا ءتۇستى»، - دەپ ءتۇيدى ولەگ الفەروۆ.
ايان بەكەن ۇلى
