تاربيە: بالاعا 3 جاسقا دەيىن نەنى ۇيرەتۋ كەرەك؟

استانا. قازاقپارات - بالا تاربيەسىندە كىشكەنە كۇنىنەن باستاپ قالىپتاستىرعان قاسيەتتەر بويىنا تەز ءسىڭىپ كەتەتىنىن بىلەمىز. ءبىراق ناقتى نە ىستەۋ كەرەك، نەنى ۇيرەتكەن دۇرىس سول جاعىن بىلە بەرمەيتىنىمىز انىق.

سوندىقتان نازارلارىڭىزعا كىشكەنە بالاعا نەنى ۇيرەتۋ كەرەكتىگى تۋرالى ماتەريالدى ۇسىنىپ وتىرمىز.

1. جاقىن ادامعا قامقورلىق جاساۋ، كومەك كورسەتىپ، جاناشىر بولۋ. وسى قاسيەتتەر ادام بويىنا كىشكەنە كۇنىنەن باستاپ سىڭە بەرۋى كەرەك. ءسابي ونىڭ كومەگى مەن قامقورلىعىنا دا ءزارۋ جاندار بار ەكەنىن بىلگەنى ابزال. «ءبىر جاقسىلىق جاساپ، ونىڭ ورنىنا سىيلىق الاسىڭ» دەپ ۇيرەتۋ - ۇلكەن قاتەلىك. ونىڭ ورنىنا ادامدار ءبىر- بىرىنە كومەكتەسۋ كەرەك ەكەنىن ءتۇسىندىرىپ، بۇنىڭ ادامشىلدىقتىڭ باستى بەلگىسى ەكەنىن ءوز ىسپەن دالەلدەپ وتىرۋ قاجەت.

 2. ءوز قاتەلىگىن مويىنداي ءبىلۋ. ءبىز «كەشىر» دەگەن ءبىراۋىز ءسوزدى ايتۋدىڭ قانشالىقتى وڭاي ەمەس ەكەنىن بىلەمىز. ال بالاعا بۇل تىپتەن قيىنعا سوعاتىنىن ەسكەرۋىمىز كەرەك. بالا ءوزىنىڭ ارەكەتىمەن بىرەۋدى رەنجىتىپ قويعانىن تۇسىنسە دە، ول ونى تەز ۇمىتىپ كەتەدى. ەگەر بالاڭىزدىڭ قاتە جاساعانىن كورسەڭىز، ىرقىنا كونە بەرۋدىڭ ورنىنا، جاقسى- جامان، بولادى- بولمايدى دەگەن تىيىمداردى دا ۇيرەتكەن ماڭىزدى. بالا كەز كەلگەن جاعدايدى ءوزى تالداپ- تارازىلاي الۋى كەرەك. سول كەزدە عانا ول ءوزىنىڭ قاتە جاساعانىن ءتۇسىنىپ، كەشىرىم سۇراۋدى دا بىرتىندەپ ۇيرەنەدى.

3. سىپايىلىق. بالا تۋعاننان باستاپ «راحمەت»، «سالەمەتسىز بە»، «ساۋ بولىڭىز» دەگەن سياقتى سوزدەردى وتە ءجيى ەستىپ تۇرۋى ءتيىس. ءبىز ونىڭ ءمان- ماعىناسىن تۇسىندىرمەي- اق، وعان ادامدارمەن قارىم- قاتىناس جاساۋدىڭ نەگىزگى تەتىكتەرىن ۇيرەتە باستايمىز. بالا كەزىنەن بويىنا سىڭگەن سىپايىلىق، العىس ءبىلدىرۋ سياقتى قاسيەتتەر ەرەسەك ومىرىندە كەز كەلگەن ورتادا ءتىل تابىسىپ، كەز كەلگەن جاعدايدان وڭاي شىعۋعا كومەكتەسەدى.

4. ءتارتىپ پەن جەكە باسىنىڭ تازالىعى. كيىم تازالىعى، سىرتقى ۇقىپتىلىق، ويىنشىقتارىن كۇتىپ ۇستاۋ سياقتى قاسيەتتەر بالانىڭ قاجەتتى ادەتتەردى بويىنا قالىپتاستىرۋىنا ىقپال ەتەدى. بىرتە- بىرتە ول ءوزىنىڭ اينالاسىن رەتكە كەلتىرىپ ءجۇرۋدى ۇيرەنەدى. زاتتارىنا ۇقىپتى ادام ومىرىنە دە ۇقىپتىلىقپەن قارايتىنىن ۇمىتپاۋىمىز كەرەك.

 5. ءتىل تابىسا ءبىلۋ. قوعامدا ءومىر سۇرە وتىرىپ، ادامدارمەن ارالاسپاۋ مۇمكىن ەمەس. سوندىقتان ءبىز بالانى ادامدارمەن تانىسۋعا، جىلدام دوستاسىپ كەتۋگە ۇيرەتۋىمىز كەرەك. قارىم- قاتىناس جاساي ءبىلۋ بالانىڭ كەيىنگى ومىرىندە ماڭىزدى ءرول اتقارادى. سوندىقتان ءدال وسى تۇستى نازاردان تىس قالدىرماعان ءجون.

6. قاۋىپسىزدىك. باعدارشامنىڭ قىزىل تۇسىندە جولدان وتۋگە بولمايدى، تانىمايتىن ادامدارمەن سويلەسپەۋ كەرەك، ولار شاقىرسا، بارماۋ كەرەك. وسى سياقتى بالانىڭ قاۋىپسىزدىگىنە قاتىستى ەرەجەلەردى كىشكەنە كۇنىنەن باستاپ ميىنا قۇيا بەرگەن ابزال، دەپ جازادى anabol.kz.