اقتوبە وبلىسىندا اراب امىرلىگى ، قىتاي جانە اۆستراليا ينۆەستورلارىنىڭ قاتىسۋىمەن 3 ءىرى ءوندىرىستى ىسكە قوسۋ جوسپارلانۋدا
بۇل تۋرالى «اقتوبە اقپارات» اقپارات ورتالىعىندا وتكەن باسپا ءسوز ءماسليحاتى بارىسىندا ءوڭىر باسشىسى بەردىبەك ساپاربايەۆ ءمالىم ەتتى.
وبلىس اكىمى ءوز سوزىندە وڭىردە «100 ناقتى قادام» ۇلت جوسپارىن جۇزەگە اسىرۋدىڭ ارالىق قورىتىندىسىنا توقتالدى.
ب. ساپاربايەۆتىڭ اتاپ وتۋىنشە، ەكسپورتتىق تاۋارلار ءوندىرۋ جانە قازاقستاننىڭ الەمدىك نارىققا شىعۋى ءۇشىن قايتا وڭدەۋ سەكتورىنا ترانس ۇلتتىق كومپانيالاردى تارتۋ شارالارى قابىلداندى. سوعان وراي وڭىردە ءبىرقاتار ينۆەستيتسيالىق جوبانى جۇزەگە اسىرۋ جوسپارلانعان. ولاردىڭ قاتارىندا ينۆەستيتسيا كولەمى 150 ميلليون دوللارلىق جىلدىق قۋاتى 1 ميلليون توننا سەمەنت پەن 500 مىڭ توننا قوسپانى قۇرايتىن زاۋىت بار. قازىرگى ۋاقىتتا «حۋاسين سەمەنت» كورپوراتسياسىنىڭ جوبالاۋشىلارى سەمەنت زاۋىتى قۇرىلىسىنىڭ جوباسىن ازىرلەۋدە.
«اۆستراليالىق «قازاقستان پوتاش كورپورەيشن» كومپانياسى ينۆەستيتسيا كولەمى 595,2 ميلليون دوللاردى قۇرايتىن، جىلدىق قۋاتى 800 مىڭ توننا كالي تىڭايتقىشى ءوندىرىسىن ىسكە قوسۋعا نيەتتى. بىرىككەن اراب امىرلىگىنىڭ «پاندجاگولدەن وازيس دجەنەرال ترەيدينگ ل. ل. س» ينۆەستورى جىلدىق قۋاتى 3 مىڭ توننا نيكەل وكسيدى كونسەنتراتى مەن 123 مىڭ توننا كوبالت وكسيدى كونسەنتراتىنا تەڭ نيكەل زاۋىتىنا 125 ميليلون دوللار ينۆەستيتسيا قۇيۋعا دايىن» ، - دەدى ب. ساپاربايەۆ.
ينۆەستورلار بۇگىندە 30 گەكتار جەر ۋچاسكەسىن الىپ، جوبالاردىڭ بيزنەس- جوسپارىن ازىرلەگەن. تاياۋ ارالىقتا جوبانى جۇزەگە اسىرۋ باستالادى. اتالعان جوبالار اياسىندا 1600 جاڭا جۇمىس ورىندارى قۇرىلماق.
