الماتى وبلىسىنداعى مەرەكەلىك شاراعا 3 مىڭنان استام ادام قاتىستى - فوتو
شارانى «كازكا» قازاقستاندىق كاسىپكەرلەر قاۋىمداستىعى، الماتىلىق بيزنەس قاۋىمداستىق پەن «تامشى» عىلىم جانە مادەنيەت قورى ۇيىمداستىردى. جوبا الماتى وبلىسى قاراساي اۋدانى جانە الماتى قالاسىنىڭ ناۋرىزباي اۋدانىنىڭ اكىمدىكتەرىنىڭ قولداۋىمەن جۇزەگە استى.
ەلدى مەكەندە 37 كيىز ءۇي تىگىلدى. ولار سولتۇستىك، وڭتۇستىك، شىعىس، ورتالىق جانە باتىس قازاقستاندى تانىستىرعان بەس اۋىلعا ءبولىندى. ءار كيىز ۇيدە ءوز ايماعىنا عانا قاتىستى داستۇرلەر كورسەتىلدى.
«مۇنداي شارانى ەكىنشى جىل وتكىزىپ وتىرمىز. ماقساتىمىز - قوناقتاردى قازاقتىڭ سالتىمەن تانىستىرۋ، ۇمىتىلىپ بارا جاتقان داستۇرلەردى جاڭعىرتۋ. سونداي- اق ىسكەرلىك ورتا بۇل جەردە بەيرەسمي تۇردە كەلىسسوزدەر جۇرگىزە الادى. مۇندا كورمە ۇيىمداستىرىلعان جوق، قوناقتار كيىز ۇيگە كىرىپ، دومبىرانىڭ قۇلاعىندا ويناپ، ءان ايتىپ، قىمىز، شاي ءىشتى، ءسويتىپ، مەرەكەلىك كوڭىل- كۇيدى سەزىندى»، - دەدى الماتىلىق بيزنەس قاۋىمداستىعىنىڭ اتقارۋشى ديرەكتورى ولجاس دوسانباي.
مەرەكەگە الماتى، استانا، وڭتۇستىك قازاقستاننىڭ كاسىپكەرلەرى جيىلدى. قوناقتارعا ارناپ ع. مۇسىرەپوۆ اتىنداعى قازاق مەملەكەتتىك اكادەميالىق تەاترىنىڭ ارتىستەرى تەاترلاندىرىلعان قويىلىم دايىندادى. ال «تامشى» عىلىم جانە مادەنيەت قورىنىڭ مۋزىكانتتارى مەن ۆوكاليستەرى كونسەرت ۇيىمداستىردى.
جيىلعاندار قازاقتىڭ سالت- داستۇرلەرىن جانە ۇلتتىق تاعامداردى دايىنداي بىلۋلەرى بويىنشا سىنعا ءتۇستى. سونىمەن قاتار ۇلتتىق ويىندارعا قاتىستى.
