ق ر باس پروكۋرورى: «كەنەتتەن جۇيكە اۋرۋىنا ۇشىراعان» لاۋازىمدى قىزمەتتەگىلەر اراسىندا 3 اكىم بار
جيىندا 2005-2013 - جىلدار ارالىعىندا جانە 2014 - جىلدىڭ 8 ايىندا قىلمىستى جاساعان سوڭ جۇيكە اۋرۋىمەن سىرقاتتانىپ قالعان ادامدارعا مەديتسينالىق شارالاردى ماجبۇرلەپ قولدانۋ دەرەكتەرى بويىنشا قوزعالعان قىلمىستىق ىستەردىڭ زاڭدىلىعىنىڭ جاي-كۇيىنە جاسالعان تالداۋ قورىتىندىلارى تالقىلاندى.
القا جۇمىسىنا جوعارعى سوتتىڭ، ىشكى ىستەر مينيسترلىگىنىڭ، دەنساۋلىق ساقتاۋ جانە الەۋمەتتىك دامۋ مينيسترلىگىنىڭ وكىلدەرى جانە بەينەكونفەرەنتسيالىق بايلانىس ارقىلى وبلىس پروكۋرورلارى قاتىستى.
وتىرىستا قىلمىستى جاساعان سوڭ جۇيكە اۋرۋىمەن سىرقاتتانىپ قالعان ادامدارعا مەديتسينالىق ەمدەۋ شارالارىن ماجبۇرلەپ تاعايىنداۋ تۋراسىنداعى سوت تاجىريبەسىنە باس پروكۋراتۋرانىڭ جۇرگىزگەن تەكسەرىستەرىنىڭ قورىتىندىلارى تالقىلاندى.
باس پروكۋرور وسى ساناتقا جاتاتىن سوت اكتىلەرىنىڭ زاڭدىلىعىن قامتاماسىز ەتۋدىڭ، قىلمىس جاساعان سوڭ دەرەۋ جۇيكە اۋرۋىنا ۇشىراعان كىنالى ادامداردىڭ قىلمىستىق جاۋاپكەرشىلىكتەن جالتارۋىنا جول بەرمەۋدىڭ وزەكتىلىگىن اتاپ ءوتتى.
قىلمىستىق ءىس ۋاقىتشا توقتاتىلا تۇرۋى كەرەك، ال كىنالى ادامدار ساۋىققان سوڭ سوت الدىندا جاۋاپ بەرۋلەرى ءتيىس. الايدا جازانىڭ بۇلتارتپاستىعى قاعيداسى ءارقاشان جۇزەگە اسا بەرمەيتىندىگى تەكسەرىس بارىسىندا بەلگىلى بولدى. سوت تاجىريبەسىن زەردەلەۋ كەزىندە قىلمىس جاسادى دەپ ايىپتالىپ وتىرعان ادامداردىڭ جاۋاپكەرشىلىك پەن جازادان جالتارىپ كەتۋىنە اكەلىپ سوققان ءبىرشاما بۇزۋشىلىقتار انىقتالدى.
قىلمىستى جاساعان سوڭ جۇيكە اۋرۋىمەن سىرقاتتانىپ قالعان 35 ادامنىڭ 21 ى اۋىر، 9 ى اسا اۋىر قىلمىس جاساعان. مۇنداي جاعدايلاردىڭ باسىم بولىگى الماتىدا (8 ادام)، وڭتۇستىك قازاقستان (7) جانە الماتى وبلىستارىندا (6) ورىن العان. تەرگەۋ بارىسىندا «كەنەتتەن» جۇيكە اۋرۋىنا ۇشىراعان 11 ادامنىڭ قىلمىس جاساعان ساتتە مەملەكەتتىك ورگانداردا ۇزاق ۋاقىت بويىنا لاۋازىمدى قىزمەت اتقارىپ كەلگەندىگى انىقتالعان. ولاردىڭ اراسىندا 3 اكىم، 3 اسكەري قىزمەتشى، 2 باس دارىگەر، 2 بۋحالتەر جانە 1 پوەزد باستىعى بار.
تالقىلاۋ قورىتىندىسى بويىنشا باس پروكۋرور اتالعان ساناتقا جاتاتىن ىستەر بويىنشا سوتتار جىبەرگەن زاڭ بۇزۋشىلىقتاردى انىقتاۋ تۋرالى جوعارعى سوتقا حابارلاۋدى تاپسىردى. اسىرەسە، سىبايلاس جەمقورلىق قىلمىستارىنا قاتىسى بار ادامداردى ماجبۇرلەپ ەمدەۋ مەرزىمىن سوزۋ تۋرالى دەنساۋلىق ساقتاۋ مەكەمەلەرى ۇسىنىستارىنىڭ نەگىزدىلىگىن مۇقيات زەرتتەۋ قاجەتتىلىگىنە نازار اۋداردى.
