بىلتىر 39 مىڭ جۇرگىزۋشى كولىك جۇرگىزۋ قۇقىعىنان ايىرىلدى
بۇل تۋرالى بۇگىن ماجىلىستەگى جەرگىلىكتى پوليتسيا قىزمەتى تاقىرىبىنا ارنالعان ۇكىمەت ساعاتىندا ىشكى ىستەر ءمينيسترى قالمۇحانبەت قاسىموۆ ءمالىم ەتتى.
ءسوز اراسىندا مينيستر رەسپۋبليكا بويىنشا جول قوزعالىستارىن باقىلاۋ ەداۋىر كۇشەيتىلگەنىن اتاپ ءوتتى. ونىڭ ايتۋىنشا، قابىلدانعان شارالار ارقاسىندا سوڭعى 3 جىلدا ەلىمىزدەگى اۆتوپاركتەر سانىنىڭ وسىمىنە قاراماستان، جول- كولىك اپاتىنىڭ كورسەتكىشتەرى تومەندەۋ ۇدەرىسىن كورسەتە باستادى.
«وتكەن جىلى جول- كولىك وقيعالارىنىڭ سانى 7 پايىزعا تومەندەدى، ال بۇل وقيعالاردان بولاتىن ادام ءولىمى 5 پايىزعا، جاراقات الۋشىلىق 7 پايىزعا ازايدى. بۇدان بولەك، اعىمداعى جىلدىڭ 4,5 ايىنداعى كورسەتكىشتەر بويىنشا جول- كولىك وقيعالار سانى 2 پايىزعا، كىسى ءولىمى 10 پايىزعا، جاراقات الۋ 1,5 پايىزعا تومەندەدى. بۇل رەتتە اپاتتىڭ 70 پايىزدان استامى جۇرگىزۋشىلەر كىناسىنەن - نەگىزىنەن جىلدمدىقتى ارتتىرۋدان، مانيەۆر ەرەجەسىن دۇرىس ساقتاماۋدان، جاياۋ جۇرگىنشىلەرگە قاتىستى ەرەجەنى ورىنداماۋدان ورىن العان»، - دەدى مينيستر.
ونىڭ سوزىنە قاراعاندا، وسىنداي بۇزۋشىلىقتىڭ سالدارىنان 2015 -جىلى 39 مىڭ جۇرگىزۋشى كولىكتى باسقارۋ قۇقىعىنان ايىرىلدى.
«تۇتاستاي العاندا، 2015 -جىلى ەلىمىزدىڭ اۋماعىنداعى جولداردا 2,5 ميلليونان استام قۇقىق بۇزۋشىلىقتىڭ الدى الىندى. ولاردىڭ جارتىسىنا جۋىعى فوتو جانە بەينە تىركەۋ جۇيەسى ارقىلى انىقتالىپ، 5,8 ميلليارد تەڭگەدەن استام ايىپپۇل سالىنعان.
اۆتور: قانات مامەتقازى ۇلى
