20:13, 31 - تامىز 2022 | GMT +6
بيىل شەتەلدە ماگيستراتۋرا مەن رەزيدەنتۋرادا وقۋعا 385 ستيپەنديا قارالعان
نۇر-سۇلتان. قازاقپارات - ەرلان قارين شەتەلدە كادرلار دايارلاۋ جونىندەگى رەسپۋبليكالىق كوميسسياسىنىڭ وتىرىسىن وتكىزدى، دەپ حابارلايدى اقوردا.
قازاقستان رەسپۋبليكاسىنىڭ مەملەكەتتىك كەڭەسشىسى ەرلان قاريننىڭ توراعالىعىمەن شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ كەزەكتى وتىرىسى ءوتتى.
كوميسسيا شەشىمىمەن ماگيستراتۋرا، دوكتورانتۋرا، رەزيدەنتۋرا باعدارلاماسى بويىنشا 84 ازاماتقا «بولاشاق» حالىقارالىق ستيپەندياسى بەرىلدى.
وتىرىس بارىسىندا پرەزيدەنت قاسىم-جومارت توقايەۆتىڭ «بولاشاق» باعدارلاماسىن قايتا باعدارلاۋ جونىندەگى تاپسىرماسىن ورىنداۋ ماسەلەسى تالقىلاندى.
ينجەنەرلىك-تەحنيكالىق كادرلاردى دايارلاۋعا باستى نازار اۋدارىلدى.
بيىل ماگيستراتۋرا مەن رەزيدەنتۋرادا وقۋ ءۇشىن 385 ستيپەنديا، دوكتورانتۋراعا 60 ستيپەنديا ءبولىندى.
وتىرىس قورىتىندىسى بويىنشا مەملەكەتتىك كەڭەسشى ءبىرقاتار ناقتى تاپسىرما بەردى.
