قازاقستاندا سوتسياليستىك ەڭبەك ەرلەرىنىڭ جاردەماقىسى 360 مىڭ تەڭگەگە جەتكىزىلمەك

نۇر- سۇلتان. قازاقپارات - قازاقستاندا سوتسياليستىك ەڭبەك ەرلەرىنىڭ جاردەماقىسى «حالىق قاھارمانى» جانە «قازاقستاننىڭ ەڭبەك ەرى» اتاعىن يەلەنۋشىلەردىڭ جاردەماقىسىمەن تەڭەستىرىلمەك.

بۇل جايىندا ءماجىلىس دەپۋتاتتارىنىڭ ساۋالىنا بەرىلگەن ق ر پرەمەر- ءمينيسترى اسقار ءماميننىڭ جاۋابىندا ايتىلعان، دەپ حابارلايدى قازاقپارات ءتىلشىسى.

«بۇگىنگى كۇنى ەكىنشى دۇنيەجۇزىلىك سوعىسقا قاتىسۋشىلاردىڭ قاتارىنداعى سوتسياليستىك ەڭبەك ەرلەرى ءۇشىن ارناۋلى مەملەكەتتىك جاردەماقى 74,65 اەك- ءتى نەمەسە 197898 تەڭگەنى، «ەڭبەك داڭقى» وردەنىنىڭ 3 دارەجەسىنە يە سوتسياليستىك ەڭبەك ەرلەرىنىڭ جاردەماقىسى 9,60 اەك- ءتى نەمەسە 25450 تەڭگەنى (2020 -جىلى) قۇرايدى. سوتسياليستىك ەڭبەك ەرلەرىنە بەلگىلەنگەن جاردەماقىنى قايتا قاراستىرۋ ۇسىنىسى وزەكتى ەكەندىگى ءسوزسىز. وسىعان وراي ۇكىمەت «قازاقستان رەسپۋبليكاسىنىڭ الەۋمەتتىك قامتاماسىز ەتۋ ماسەلەلەرى بويىنشا كەيبىر زاڭنامالىق اكتىلەرىنە وزگەرتۋلەر مەن تولىقتىرۋلار ەنگىزۋ تۋرالى» ق ر زاڭىنىڭ جوباسىن ازىرلەۋگە باستاما جاسادى. ونىڭ اياسىندا سوتسياليستىك ەڭبەك ەرلەرى مەن «ەڭبەك داڭقى» وردەنى يەگەرلەرىنىڭ قىزمەتتەرى مەن جانكەشتى ەڭبەكتەرىن مويىنداۋ ماقساتىندا ولارعا بەرىلەتىن ارناۋلى مەملەكەتتىك جاردەماقى كولەمىن «حالىق قاھارمانى» مەن «قازاقستاننىڭ ەڭبەك ەرى» اتاعىن يەلەنگەندەرگە بەرىلەتىن 138,63 ا ە ك- كە نەمەسە 367508 تەڭگەگە (2020 -جىلى) دەيىن ارتتىرۋ شارالارى قاراستىرىلعان»، - دەپ اتاپ وتەدى ۇكىمەت باسشىسى.

ونىڭ ايتۋىنشا، قازىرگى ۋاقىتتا زاڭ جوباسىنىڭ تۇجىرىمداماسى ازىرلەنىپ، زاڭ جوبالاۋ قىزمەتى ماسەلەلەرى جونىندەگى ۆەدومستۆوارالىق كوميسسيا تاراپىنان ماقۇلدانعان. رەسپۋبليكالىق بيۋدجەتتىك كوميسسيا دا مەملەكەتتىك بيۋدجەتتەن قوسىمشا شىعىستارعا قولداۋ ءبىلدىرىپ وتىر.

«اتالعان زاڭ جوباسى بەلگىلەنگەن تارتىپپەن مەملەكەتتىك ورگانداردا كەلىسىم پروتسەدۋراسىنان ءوتىپ جاتىر جانە ق ر ۇكىمەتىنىڭ 2020 -جىلعا ارنالعان زاڭ جوبالاۋ جۇمىسى جوسپارىنا سايكەس، وسى جىلدىڭ ساۋىرىندە ق ر پارلامەنتى قاراۋىنا ەنگىزۋ كوزدەلگەن «، - دەدى اسقار مامين.

اۆتور: مارلان جيەمباي