قاڭتاردا كەلتىرىلگەن شىعىندى وتەگەن 35 كۇدىكتىگە قاتىستى قىلمىستىق ءىس قىسقارتىلدى
بۇل تۋرالى ق ر ىشكى ىستەر مينيسترلىگى تەرگەۋ دەپارتامەنتىنىڭ باسشىسى سانجار ءادىلوۆ ايتتى، دەپ حابارلايدى قازاقپارات ءتىلشىسى.
«بۇرىن سوتتىلىعى بولماعان، شىعىندى ءوز ەركىمەن وتەگەن 421 كۇدىكتىگە قاتىستى بۇلتارتپاۋ شارالارى قوعامنان وقشاۋلاۋمەن بايلانىستى ەمەس جازاعا وزگەرتىلدى. بۇدان ءارى ولارعا ەشقايدا كەتپەۋ قولحاتى، كەپىل، ءۇي قاماقتا ۇستاۋ سياقتى شارالارى قولدانىلدى. ورتاشا جانە ونشا اۋىر ەمەس قىلمىس جاساعان، سونداي-اق جابىرلەنۋشىلەرگە كەلتىرىلگەن شىعىندى وتەگەن 35 كۇدىكتىگە قاتىستى قىلمىستىق ءىس قىسقارتىلدى»، - دەدى سانجار ءادىلوۆ ورتالىق كوممۋنيكاتسيالار قىزمەتىندە.
ونىڭ ايتۋىنشا، ءوز كەزەگىندە سوتتار دا جازا تاعايىنداعان كەزدە تەرگەۋ مالىمەتتەرىمەن قاتار، سوتتالۋشىلاردىڭ ءوز ۇستانىمىن، وكىنىش ءبىلدىرۋىن، شىعىندى وتەگەنىن جانە تەرگەۋگە جاردەم كورسەتكەنىن دە ەسكەرۋدە.
«الماتى وبلىسىنىڭ ەكى تۇرعىنى الماتى قالاسىنداعى جاپپاي تارتىپسىزدىك كەزىندە ابىلاي حان داڭعىلىنداعى دۇكەندەردىڭ بىرىنەن جارتى ميلليون تەڭگەدەن استام سومانىڭ تاۋارىن ۇرلاعان. سوت ايىپتالۋشىلاردىڭ جەكە باسىن مىنەزدەيتىن مالىمەتتەردى، جاساعان ارەكەتىنە وكىنىش ءبىلدىرۋىن جانە شىعىندى وتەگەنىن ەسكەرە وتىرىپ، 2 جىلعا باس بوستاندىعىن شەكتەۋ ۇكىمىن شىعاردى»، - دەدى ۆەدومستۆو وكىلى.
