قىرعىزستاندا قىلمىس جاساپ، قاشىپ جۇرگەن 35 ادام قازاقستاننان ۇستالدى
ناۋرىز ايىندا قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ پەن قىرعىز رەسپۋبليكاسىنىڭ پرەزيدەنتى سادىر جاپاروۆ اراسىندا ساۋدا-ەكونوميكالىق ىنتىماقتاستىقتى نىعايتۋ تۋرالى كەلىسىلىم جاسالدى.
وسىعان وراي ەكى ەلدىڭ ىشكى ىستەر ورگاندارى شەكارا ماڭىندا ورنالاسقان اۋداندارداعى كريمينوگەندىك جاعدايدى جاقسارتۋ جانە مەملەكەتتەر ەكونوميكاسىن دامىتۋ ءۇشىن قولايلى جاعدايلار جاساۋ جونىندە شارالار قابىلداۋدا. كەزدەسۋ بارىسىندا قازاقستان مەن قىرعىزستاننىڭ ىشكى ىستەر مينيسترلەرى ەرلان تۇرعىمبايەۆ پەن ۇلان نيازبەكوۆ ەكىجاقتى ىنتىماقتاستىق ماسەلەلەرىن تالقىلاپ، اۋقىمدى تاقىرىپتار بويىنشا پىكىر الماستى.
كەزدەسۋ بارىسىندا ەكى ەلدىڭ پوليتسيا ۆەدومستۆولارىنىڭ باسشىلارى ترانسشەكارالىق ۇيىمداسقان قىلمىسقا قارسى كۇرەستە ىشكى ىستەر ورگاندارىنىڭ بىرلەسكەن كۇش- جىگەرىن ودان ءارى ۇيلەستىرۋ جانە جۇمىسىن جانداندىرۋ، جەدەل، كريميناليستيكالىق، قۇقىقتىق اقپارات الماسۋ تۋرالى نيەت ءبىلدىردى.
قىرعىزستاننىڭ ءى ءى م باسشىسى قازاقستاننىڭ ىشكى ىستەر ورگاندارىن جاڭعىرتۋ، سونىڭ ىشىندە پوليتسيا قىزمەتىن تسيفرلاندىرۋ، قوعامدىق ءتارتىپ پەن قاۋىپسىزدىكتى قامتاماسىز ەتۋ، ۆەدومستۆولىق ءبىلىم بەرۋ رەفورماسى ماسەلەلەرى بويىنشا حالىقپەن قارىم- قاتىناس جاساۋ، سونداي- اق ازاماتتاردىڭ پوليتسياعا دەگەن سەنىمىن ارتتىرۋ جانە ولارمەن ءتيىمدى كەرى بايلانىس ورناتۋ ماسەلەلەرىنە ەرەكشە قىزىعۋشىلىق تانىتتى.
«قازىرگى زامان تالابىنا ساي قىرعىزستاندا قازاقستانداعى سياقتى سوت- قۇقىق جۇيەسىن، ونىڭ ىشىندە ىشكى ىستەر ورگاندارىن رەفورمالاۋ بويىنشا جۇمىستار جۇرگىزىلۋدە. بۇگىنگى كەزدەسۋ ىشكى ىستەر ورگاندارىنىڭ قىزمەتىن رەفورمالاۋ سالاسىندا وڭ تاجىريبە الماسۋ ءۇشىن پايدالى بولاتىنىنا سەنىمدىمىن. ءبىز ىنتىماقتاستىقتى نىعايتۋعا مۇددەلىمىز جانە ءوزارا بايلانىستى كۇشەيتۋدى ۇسىنامىز»، - دەدى ۇلان نيازبەكوۆ.
جەدەل- ىزدەستىرۋ قىزمەتى بويىنشا ىنتىماقتاستىق وڭ ناتيجەلەر بەرۋدە. وتكەن جانە اعىمداعى جىلدىڭ ءۇش ايىندا قازاقستاندا قىلمىس جاساۋعا قاتىسى بار 35-تەن استام ادام انىقتالدى. ءوز كەزەگىندە قىرعىزستان ميليتسيا قىزمەتكەرلەرى ىزدەۋ جاريالانعان 17 كۇدىكتىنى ۇستادى.
مينيستر ەرلان تۇرعىمبايەۆ جۋىردا عانا الماتىدا بىرلەسكەن ارنايى وپەراتسيا ناتيجەسىندە اۆتوكولىكتەر ارقىلى جاسالعان بىرنەشە الاياقتىققا قاتىسى بار ۇ ق ت مۇشەلەرىنىڭ ءبىرى ۇستالعانىن حابارلادى. ءبىرقاتار تەرگەۋ امالدارى جۇرگىزىلگەننەن كەيىن ول كورشى رەسپۋبليكاعا ەكستراديتسيالانادى.
شەكارا ماڭى ىنتىماقتاستىعى دامۋدا. الماتى جانە جامبىل وبلىستارىنىڭ اۋماقتىق پوليتسيا بولىمشەلەرى كورشىلەس رەسپۋبليكانىڭ ىستىقكول، شۋ جانە تالاس وبلىستارىنداعى قىرعىز ارىپتەستەرىمەن تىعىز قارىم- قاتىناستا.
«ەكى ەلدىڭ ىشكى ىستەر ورگاندارىنىڭ ىنتىماقتاستىعى جوعارى دەڭگەيدە. 2015 -جىلدان باستاپ ۇيلەستىرۋ جۇمىس توبى جۇمىس ىستەيدى، ونىڭ قۇرامىنا اكىمشىلىك، كريمينالدىق پوليتسيا، كوشى-قون قىزمەتى جانە باسقا دا بولىمشەلەردىڭ وكىلدەرى كىرەدى. ءبىزدىڭ ماماندار بىرلەسكەن وپەراتسيالار مەن ءىس- شارالاردى جۇرگىزىپ، قىلمىستاردى بىرگە زەردەلەيدى، قىلمىستىق توپتاردىڭ ارەكەتتەرىن، ەسىرتكىنى تاسىمالداۋدى، زاڭسىز كوشى- قون ارنالارىن انىقتايدى جانە جولىن كەسەدى. بۇل باعىتتاعى جۇمىس توقتاپ قالماۋى ءتيىس، ويتكەنى ىشكى قاۋىپسىزدىك قانا ەمەس، جالپى ورتالىق ازيا قاۋىپسىزدىگى دە وسىعان بايلانىستى»، - دەپ اتاپ ءوتتى قازاقستان ءى ءى م باسشىسى ەرلان تۇرعىمبايەۆ.
تاراپتار ەكى ەلدىڭ پوليتسيا ۆەدومستۆولارىنىڭ قاۋىپسىزدىكتى قامتاماسىز ەتۋ جانە قىلمىسقا قارسى كۇرەس، ونىڭ ىشىندە ترانسۇلتتىق جانە ۇيىمداسقان نىساندار بويىنشا تىعىز بايلانىس جالعاساتىنىن اتاپ ءوتتى.
