نۇر- سۇلتاننىڭ بايقوڭىر اۋدانىندا 35 كوپقاباتتى ءۇي سۇرىلەدى
بايقوڭىر اۋدانى اكىمىنىڭ ورىنباسارى جاسۇلان بايجانوۆ مۇلىك يەلەرى بىرلەستىكتەرىن قۇرۋ ماسەلەسىنە ارنالعان قوعامدىق تىڭداۋدا وسىنداي مالىمەت ايتتى.
«اۋدانداعى تۇرعىن ءۇي قورىنىڭ ساپاسىن جاقسارتۋ ءۇشىن 2020 -جىلى ۇيلەردى تۇگەلدەي پاسپورتتاعان بولاتىنبىز. ءار ۇيگە ءتولقۇجات جاساپ، پروبلەماسىن جەكە- جەكە قارادىق. پاسپورتتاۋ قورىتىندىسى بويىنشا 446 ءۇيدىڭ 206-سىندا عانا اقاۋ جوعى بەلگىلى بولدى. 174 ءۇيدى جوندەۋ قاجەت. ونىڭ ىشىندە 53 ءۇيدىڭ جاعدايى وتە مۇشكىل. اۋدانىمىزدا ەسكى ۇيلەردى ءسۇرۋ ماسەلەسى دە وزەكتى. جوندەۋ كومەكتەسپەيدى دەگەن 35 كوپقاباتتى ءۇي بار. ونىڭ التاۋى 63-76 پايىز اراسىندا توزعان. ال 29 كوپقاباتتى ءۇي 33-59 پايىز اراسىندا توزعان. ەسكى ۇيلەردى ءسۇرۋدىڭ 2023-2025 -جىلدارعا جوسپارلانعان ءۇشىنشى كەزەڭىنە وسى ۇيلەر ەنەيىن دەپ تۇر»، - دەيدى اكىمدىك وكىلى.
سونداي- اق، ول باراك تيپتەگى 29 ءۇيدىڭ دە سۇرىلەتىنىن ايتتى. «باراك تيپىندەگى 29 ءۇي ءسۇرىپ تاستاۋعا جاتقىزىلعان. ولاردىڭ توزۋ كورسەتكىشى 50-77 پايىز اراسىندا. پاسپورتتاۋ قورىتىندىسى بويىنشا اقاۋ تابىلعان ۇيلەردىڭ ساپاسىن جاقسارتۋ تۋرالى جۇمىس جوسپارى جاسالدى. تۇرعىندار اراسىندا تۇرعىن ءۇي شارۋشالىعىن جاڭعىرتۋ باعدارلاماسى بەلسەندى تۇردە ءتۇسىندىرىلىپ جاتىر. قازىر 17 ءۇيدى وسى باعدارلاماعا دايىنداپ جاتىرمىز. تاعى 3 ءۇيدىڭ قۇجاتى ءبىر اپتانىڭ ىشىندە بىتەدى. بيىل 20 ءۇيدىڭ قۇجاتىن دايىنداساق، قالعانى كەلەسى جىلعا قالعالى تۇر»، - دەدى جاسۇلان بايجانوۆ.
اۆتور: ەسىمجان ناقتىباي