«الماتى-قورعاس» جولىندا 35 شاقىرىم ەلەكتر جەلىسى ۇرلانعان

نۇر-سۇلتان. قازاقپارات - جول قىزمەتىنىڭ كۇندەلىكتى تەكسەرۋ جۇمىستارىنا قاراماستان، اقىلى ۋچاسكەلەردە جول ەلەمەنتتەرىن ۇرلاۋ فاكتىلەرى ازايماي تۇر، دەپ حابارلايدى «قازاۆتوجول» ۇ ك باسپا ءسوز قىزمەتى.

ماسەلەن، «نۇر-سۇلتان- شۋچينسك» ۋچاسكەسىندە 2018-جىلدان باستاپ 10 ۇرلىق فاكتىسى تىركەلگەن. كابەلدەر مەن ءۇي جانۋارلاردىڭ جولعا شىقپاۋى ءۇشىن ورناتىلعان ارنايى قورشاۋلارمەن قاتار، باسقا دا باعالى تەحنيكالىق-قۇرالدار ۇرلانۋدا. 2018-جىلدىڭ ءساۋىر ايىندا دەمالىس الاڭىنداعى جاپپا (بەسەدكا)، ال اعىمداعى جىلدىڭ تامىز ايىندا اقىلى ۋچاسكەدەن ديزەلدى-گەنەراتور ۇرلانعان. سونىمەن قاتار، 7 دانا جارىق پروجەكتورى، 30 عا جۋىق جارىق بەرەتىن قۇرىلعى، 412 بىرلىك كونسول ۇرلانعان.

«نۇر-سۇلتان-تەمىرتاۋ» ۋچاسكەسىندە 5 مىڭ مەتردەن استام قورشاۋ ۇرلاندى.

كابەلدەر مەن قورشاۋلاردى ۇرلاۋ فاكتىلەرى الماتى وبلىسىنداعى اقىلى ۋچاسكەلەردە دە ءجيى تىركەلەدى. بۇل وبلىستاعى ۇرلىقتىڭ اۋقىمى دا كەڭ. «الماتى-قورعاس» اقىلى جولىنداعى قايتا جاڭارتۋ جۇمىستارىنان كەيىن ۋچاسكەدەن 35 شاقىرىم ەلەكتر جەلىسى ۇرلانعان. الايدا، بۇل اتالمىش ۋچاسكەدەگى ۇرلىق فاكتىلەرىنىڭ تەك باستاماسى عانا. بايسەركە، اقباستاۋ جانە قازاتكوم جول ايىرىعىندا 3 ترانسفورماتور ۇرلانعان. «الماتى-قاپشاعاي» ۋچاسكەسىندەگى ءۇش رەت ۇرلانعان ەلەكتر جەلىلەرىنىڭ جالپى كولەمى 6 شاقىرىمعا جەتەدى.

جولدىڭ بويىنداعى دەمالىس الاڭدارىنان ورىندىق پەن ۇستەلدەرمەن قاتار، ايالداما پاۆيلوندارىن ۇرلاعان فاكتىلەر دە تىركەلگەن.

ۇرلاۋ فاكتىلەرى انىقتالعاننان كەيىن ديرەكتسيا قىزمەتكەرلەرى شۇعىل تۇردە ىشكى ىستەر بولىمىنە حابار بەرەدى. پوليتسيا قىزمەتكەرلەرى وقيعا ورنىندا اكت جاساپ، 1 تاۋلىكتىڭ ىشىندە رەسمي حات جەرگىلىكتى پوليتسيا بولىمشەسىنە جەتكىزەدى.

«QazAvtoJol» ۇ ك» ا ق «اقىلى اۆتوموبيل جولدارى ديرەكتسياسى» فيليالى جول بەلگىلەرىن ۇرلاۋ جولداعى قاۋىپسىزدىككە اسەر ەتەتىنىن ەسكەرتەدى.