قازاقستان مەن قىتاي 35 جوباعا قول قويدى
ەكى ەل كاسىپكەرلەرى بىرلەسكەن جاڭا 35 جوبانى جۇزەگە اسىرۋعا بايلانىستى كەلىسىم جاسادى.
بۇل جايىندا «قورعاس» شەكارا ماڭى ىنتىماقتاستىعى حالىقارالىق ورتالىعىندا وتكەن بيزنەس- فورۋمدا بەلگىلى بولدى، دەپ حابارلايدى 24.kz.
قورعاس - قازاقستان مەن قىتاي شەكاراسىنىڭ تۇيىسكەن تۇسى عانا ەمەس، ستراتەگيالىق سەرىكتەستىككە سەرپىن بەرەتىن ورتالىق. كورشىلەس ەلدىڭ كاسىپكەرلەرى تاعى قول الىسىپ، 3 ملرد دوللاردان اساتىن بىرلەسكەن جوبالارىن جاسايمىز دەگەن شەشىمگە كەلدى. ولار ساۋدا، ونەركاسىپ، عىلىم، ءبىلىم جانە تۋريزم سالالارىن قامتيدى.
«قورعاس» ش ى ح و» ا ق اكىمشىلىك كوميتەتىنىڭ پرەزيدەنتى قاحارمان جازيننىڭ ايتۋىنشا، جاركەنت پەن قورعاس قالالارىنىڭ اراسىنداعى دوستىق تۋرالى كەلىسىمگە قول قويىلدى. بيىل ساۋدا كەشەنى، قوناق ۇيلەر، بيزنەس ورتالىعى سياقتى جاڭا نىساندار پايدالانۋعا بەرىلمەك. سونداي- اق ويىن- ساۋىق ورتالىعىنىڭ قۇرىلىسى باستالادى. بۇل نىساندار قىتايلىق تۋريستەردى تارتاتىن بولادى.
«وسى بيزنەس فورۋمنىڭ ارقاسىندا ءبىز قازاقستاندىق كومپانيامەن كەلىسىم جاسادىق. 120 ميلليون يۋان ينۆەستيتسيا سالاتىن ويىمىز بار»، - دەيدى قورعاس قالاسىنداعى حالىقارالىق كومپانيانىڭ ديرەكتورىنىڭ يۋي چەنجۋن.
ينۆەستورلار مەن كاسىپكەرلەردىڭ تىكەلەي ديالوگى تۇرىندە وتكىزىلەتىن مۇنداي فورۋم قورعاستا العاش رەت ۇيىمداستىرىلىپ وتىر. قاتىسۋشىلار جيىندا وزدەرىن تولعاندىرعان بارلىق ماسەلەنى تالقىلادى. مۇناي جيىن ىسكەرلىك تۋريزم، ساۋدا، مادەنيەت جانە گۋمانيتارلىق سالاداعى قارىم- قاتىناستى دامىتۋعا جاڭا مۇمكىندىكتەر اشادى.
«قورعاس» ەركىن ەكونوميكا ايماعى اكىمشىلىك كوميتەتى باسشىسىنىڭ ورىنباسارى ۋ حاونىڭ پىكىرىنشە، «ءبىر بەلدەۋ، ءبىر جول» باستاماسىنىڭ اياسىندا «قورعاس» شەكارا ىنتىماقتاستىعى ورتالىعىندا تىڭ نارىقتى يگەرەتىن مۇمكىندىكتەر پايدا بولدى. «بۇل جەردە قىتاي عانا ەمەس، ەۋرازيالىق ەكونوميكالىق وداق، ت م د ەلدەرى مەن وڭتۇستىك- شىعىس ازياداعى مەملەكەتتەرگە شىعۋعا بولادى».
«قورعاس» شەكارا ماڭى ىنتىماقتاستىعى حالىقارالىق ورتالىعى تاياۋدا ەركىن ەكونوميكالىق ايماق مارتەبەسىنە يە بولدى. ەندى كاسىپكەرلەر نەگىزگى سالىقتان بوساتىلىپ، الەۋمەتتىك سالىقتى عانا تولەيدى. فورۋمعا قاتىسۋشىلاردىڭ ايتۋىنشا، بۇل جەڭىلدىك قىتاي ينۆەستورلارىن قازاقستانعا تارتۋعا سەپتىگىن تيگىزبەك.
