گيمالاي ەكسپەديتسياسىنىڭ ەۆەرەست شىڭىن باعىندىرعانىنا 35 جىل تولدى
1982 -جىلى 11 الپينيست الەمدەگى ەڭ بيىك ەۆەرەست شىڭىن باعىندىردى. ولاردىڭ ۇشەۋى قازاقستاندىق الپينيستەر ۆالەري حريشاتىي، قازبەك ۆاليەۆ جانە يۋري گولودوۆ بولاتىن. شىڭ باسىنا وعان دەيىن ەشكىمنىڭ تابانى تيمەگەن ەدى. ال قازاقستاندىق قايسار جىگىتتەر وتە كۇردەلى وڭتۇستىك- باتىس قابىرعاسىمەن ورمەلەپ شىقتى. سودان بەرى 35 جىل وتسە دە ءالى كۇنگە دەيىن ءبىر دە ءبىر الپينيست ولاردىڭ ەرلىگىن قايتالاي الماي كەلەدى.
8848 مەترلىك بيىكتىكتى ەڭسەرۋگە دايىندىق تا وڭاي بولعان جوق. 16 ادامنان تۇراتىن كوماندا قۇرامىنا قابىلدانۋعا 300-دەن استام تالاپكەر نيەت بىلدىرگەن. تاۋعا شىعۋعا دايىندىق 1979 -جىلدان باستاپ جۇرگىزىلگەن. وسى ۋاقىت ارالىعىندا الپينيستەر ءتۇرلى مەديتسينالىق، پسيحولوگيالىق جانە فيزيكالىق جاتتىعۋلار مەن تەكسەرۋلەردەن وتكەن.
يۋريي گولودوۆ:
«بارلىق سىناقتاردىڭ ناتيجەسىندە مەن ەكسپەديتسيا قۇرامىنا قابىلداندىم. ءبىراق قاتتى قۋانىپ، ەرەكشە سەزىم بولعان جوق. ويتكەنى شىعۋ قانداي قيىن بولسا، ءتۇسۋ ودان دا ەكى ەسە اۋىر بولاتىنىن سەزدىم. تەك ءوزىڭنىڭ قورقىنىشىڭدى جەڭىپ عانا قويماي، وزگە ارىپتەستەرىڭنىڭ دە بارلىق قيمىل- قوزعالىسىن قاداعالاپ، باقىلاپ وتىرۋىڭ كەرەك. سەبەبى ءبىر شالىس قادام بارلىعىن ءبۇلدىرۋى مۇمكىن»، - دەيدى 1982 -جىلعى گيمالاي ەكسپەديتسياسىنىڭ قاتىسۋشىسى.