قىتاي سپورتشىلارىنىڭ اراسىندا ريودا ونەر كورسەتەتىن 35 وليمپيادا چەمپيونى بار

استانا. قازاقپارات - ريو وليمپياداسىنىڭ الاۋى جانعانعا 16 كۇن قالدى. ءتورتجىلدىقتىڭ باستى دوداسى جاقىنداعان سايىن ءار ەل ءوزىنىڭ وليمپياداعا جەڭىپ العان جولدامالارىن ساناپ، قانشا مەدال الۋعا مۇمكىندىكتەرى بارىن بولجاۋدا.

وليمپيادا ويىندارىندا ويناتىلاتىن جالپى مەدالدار نەگىزىنەن ا ق ش، رەسەي، قىتاي سياقتى الپاۋىت ەلدەر اراسىندا تالاسقا تۇسەدى. بيىل وسى ءۇش ەلدىڭ قايسىسى مەدالدار سانى جاعىنان كوش باستايتىنى ازىرگە بەلگىسىز. الايدا، قىتاي مەملەكەتى وليمپيادا تاريحىندا ريوعا تۇڭعىش رەت ەڭ كوپ جولداما جەڭىپ الىپتى. ولار بۇل تۋرالى وزدەرىنىڭ jingji.sports.cn سايتىندا جاريالادى.

قىتاي دەرەك كوزىنە سۇيەنسەك، ولار وليمپياداعا 26 سپورت تۇرىنەن 416 جولداما جەڭىپ العان. جالپى ريوعا 711 ادام باراتىنى ايتىلعان. جولداما جەڭىپ العان سپورتشىلاردىڭ 256 ءسى ايەل، 160 ى ەر. وسى 416 سپورتشىعا ريودا 259 ادام قىزمەت ەتەدى. ولار باپكەرلەر، دارىگەرلەر، پسيحولوگ ماماندار. بۇلاردىڭ ىشىندە 29 ى ارنايى گەرمانيا، ا ق ش سياقتى وزگە ەلدەن كەلىپ، قىتايلىق سپورتشىلارعا جوعارى جەتىستىككە جەتۋگە اتسالىسىپ جۇرگەندەر.

ريودا ونەر كورسەتەتىن سپورتشىلاردىڭ 108 ءى لوندون وليمپياداسىنا قاتىسقان. جالپى ريودا قىتاي قۇراماسىنىڭ ساپىندا 35 وليمپيادا چەمپيونى ونەر كورسەتەدى. ونىڭ 27 ءسى لوندون وليمپياداسىنىڭ چەمپيوندارى. 416 سپورتشىنىڭ ىشىندە ەڭ جاسى ءجۇزۋشى يانحان - 14 جاستا. ەڭ جاسى ۇلكەنى وق اتۋ سپورتىنان وليمپيادا چەمپيونى 39 جاستاعى چەن ين. قىتايدىڭ 29 ولكەسىنەن جاساقتالعان سپورتشىلاردىڭ قاتارىندا قازاق، موڭعول، دۇنگەن، مانزۋ سياقتى ون از ۇلت وكىلىنەن 32 سپورتشى جولداما جەڭىپ العان.

ەستەرىڭىزگە سالا كەتەيىك، قازاقستان قۇراماسى قازىرگە دەيىن سپورتتىڭ 26 تۇرىنەن 104 جولداما جەڭىپ العان بولاتىن.

اۆتور: كۇنسۇلتان وتارباي