وڭتۇستىك قازاقستان وبىلىسىنداعى سەمەنت زاۋىتىنىڭ 35 پايىز ءونىمى شەتەلگە ساتىلۋدا
كەزىندە ءتۇستى سەمەنتىمەن اتى الەمگە تانىلعان ساستوبەدەگى زاۋىت ەندى قورشاعان ورتاعا زالالىن تيگىزبەيدى. جاڭا جۇمىس ۇردىسىنە ساي، ەلەكتروندى سۇزگىنىڭ كومەگىمەن سىرتقا شىعاتىن توزاڭ اۋاعا تارامايدى.
وسىلايشا، زياندى قالدىقتار سىرتقا جايىلماي، ساپالى ءونىم جاسالاتىن بولدى. كۇنى كەشەگە دەيىن شاڭعا بوگىپ كەلگەن اۋىل تۇرعىندارى بۇل جوبانىڭ جۇزەگە اسقانىنا ءدان ريزا. ال وتاندىق كاسىپورىن، ەكسپورتتىق الەۋەتتى ارتتىرۋ ءۇشىن ءونىمنىڭ وزىندىك قۇنىن ارزانداتۋ ءۇشىن قام- قارەكەت جاساپ جاتىر.
تابيعاتى كەرەمەت تۇلكىباس اۋدانىنداعى ساستوبە سەمەنت زاۋىتىنان شىعاتىن توزاڭ وسى كەزگە دەيىن اينالاداعى اۋىلداردىڭ مازاسىن قاشىرىپ كەلگەن. اسىرەسە ىنتىماق اۋىلىنىڭ تۇرعىندارىن. زاۋىتتىڭ بۇرىنعى قوجايىندارى توزاڭ شىعاتىن بيىك قۇبىرعا سۇزگىنى وسىدان 5 جىلداي بۇرىن ورناتقان. ءبىراق تولىققاندى ىسكە قوسا الماپتى. وتاندىق ينۆەستور سول جوبانى تولىق جۇزەگە اسىردى. زاۋىت وتكەن جىلى 438 مىڭ توننا سەمەنت شىعارعان. سونىڭ %35- ىن شەتەلگە ساتىپتى. ساپاسى جوعارى بولعان سوڭ، سۇرانىس ارتقان. ەندى باسەكەلەستىكتى ارتتىرۋ ءۇشىن ىرگەدەگى جاڭا كەن ورنىن الماقشى. ءتيىستى مەكەمەلەردىڭ كەلىسىمىن كۇتىپ وتىر. ونى ىسكە قوسسا، وزىندىك قۇن %10 - عا تومەندەيدى. سوندا ورتالىق ازيانىڭ نارىعىنداعى ورنىن ساقتاپ قالادى.
«بىلتىر ءبىز وزبەكستانعا قازاقستاننان سەمەنت جىبەرگەن 10 جىلدىڭ ىشىندە ءبىرىنشى زاۋىت بولعانبىز. بيىل دا ولار ءونىمىمىزدى دايىن، كەلىسىمشارتىمىز بار. ءبىزدىڭ ساپامىز ولارعا ۇناپ وتىر»، - دەيدى SAS- Tobe Technologies ج ش س باس ديرەكتورى تالعات ءسادۋاقاسوۆ.
سەمەنتتىڭ 7 ماركاسىن شىعاراتىن زاۋىت اينالاداعى اۋىلدىڭ الەۋمەتتىك ماسەلەسىن شەشۋدەن شەت قالمايدى ەكەن. بىلتىر 15 ميلليون تەڭگەگە كوشەلەردى جوندەپ، ارىق- اتىزدى رەتكە كەلتىرىپتى. بيىل دا سونشا قارجى ءبولىپ، ىنتىماق اۋىلىندا سۋ جۇيەسىن جوندەيدى. سونىمەن قاتار، ۇلى جەڭىس قارساڭىندا ارداگەرلەر اللەياسىن جوندەپ، وبەليسك ورناتىپ تا جاتىر.
