قاراعاندى وبلىسى قازىبەك ءبيدىڭ 350 جىلدىعىن جوعارى دەڭگەيدە اتاپ وتپەك

استانا. قازاقپارات - ەگىندىبۇلاققا جۇمىس ساپارى بارىسىندا ەرلان قوشانوۆ قازىبەك ءبي بابامىزدىڭ 350 جىلدىعىن اتاپ وتۋگە قاتىستى دايىندىق جۇمىستارىنىڭ بارىسىمەن تانىسىپ قايتتى، دەپ حابارلايدى قاراعاندى وبلىسى اكىمدىگىنىڭ رەسمي سايتى.

ايماق باسشىسى قازاقتىڭ عۇلاما ءبيى جانە شەشەنى، قوعام قايراتكەرى قازىبەك ءبيدىڭ 350 جىلدىعىنا وراي سالىنعان ستەللانى قاراپ شىقتى. ءدال وسى نىساننىڭ سالتاناتتى اشىلۋىنان مەرەيتويلىق شارالار باستاۋ الادى.

- مەنى ەگىندىبۇلاقتىڭ تۇرعىندارى ءبىزدىڭ عۇلاما بابامىزدىڭ 350 جىلدىعىنا تىڭعىلىقتى دايىندالىپ جاتقانى قاتتى قۋانتادى، - دەدى ەرلان قوشانوۆ. - بۇل اۋقىمدى شارا تەك قارقارالى اۋدانى مەن قاراعاندى وبلىسى ءۇشىن عانا ەمەس، بۇكىل قازاقستان تۇرعىندارى ءۇشىن دە ۇلكەن ماڭىزعا يە. ءبىز بارلىعىمىز وسى مەرەكەنىڭ لايىقتى وتۋىنە ۇلەسىمىزدى قوسۋىمىز قاجەت.

قاز داۋىستى قازىبەك ءبي، قازىبەك كەلدىبەك ۇلى - قازاق حالقىنىڭ XVII - XVIII عاسىرلارداعى ۇلى ءۇش ءبيىنىڭ ءبىرى، كورنەكتى قوعام جانە مەملەكەت قايراتكەرى. ورتا ءجۇز ارعىن تايپاسىنىڭ قاراكەسەك رۋىنا كىرەتىن بولاتقوجا اتاسىنان شىققان ول 1667 -جىلى سىر بويىندا دۇنيەگە كەلگەن. ارعى اتالارى شانشار ابىز، بۇلبۇل، ءوز اكەسى كەلدىبەك - ەسىمدەرى ەلگە بەلگىلى ءادىل بيلەر بولعان.

 350 جىلدىق مەرەيتويدى اتاپ ءوتۋ 19 -تامىزدا قارقارالى اۋدانىنىڭ ەگىندىبۇلاق كەنتىندە باستالادى. اۋىل ماڭىندا جۇزدەگەن اقشاڭقان كيىز ۇيلەر تىگىلەدى. مەرەكەلىك شارالار قازىبەك ءبي ەسكەرتكىشىنە گۇل شوقتارىن قويۋ جانە قۇران باعىشتاۋدان باستالادى. كورەرمەندەر نازارىنا مەرەكەلىك كونسەرت پەن سپورتتىق سايىستار ۇسىنىلادى.

بۇل كۇنى قاز داۋىستى قازىبەك ءبي جولىمەن: «بابالارعا تاعزىم!» اۆتوكەرۋەنى باستاۋ الادى. 28 كەرۋەنگە قاتىسۋشىلار 7 كولىكپەن قارقارالى، بۇقار جىراۋ، جاڭاارقا جانە  ۇلىتاۋ اۋداندارى، جەزقازعان،  قىزىلوردا، تۇركىستان، تاشكەنت، ناۋاي، شىمكەنت، تاراز، بالقاش قالالارى، اقتوعاي جانە شەت اۋداندارى ارقىلى وتەدى.

ال 30 -تامىزدا قاراعاندى قالاسىندا مارەگە جەتەدى.

 20 -تامىزدا قاراعاندى قالاسىنداعى كەنشىلەر مادەنيەت سارايىندا موڭعوليا، قىتاي، قىرعىزستان جانە قازاقستاننىڭ اقىندارى قاتىساتىن حالىقارالىق ايتىس بولادى. ءداستۇرلى تويلاۋ قازاقشا كۇرەس جانە بايگە سپورتتىق جارىستارىمەن جالعاسادى. جارىس جەڭىمپازدارىنا ۇيىمداستىرۋشىلار سىيلىق رەتىندە اۆتوكولىك، موتوسيكل، كۆادروتسيكل جانە تۇرمىستىق تەحنيكا تابىس ەتەدى.

قازىبەك ءبيدىڭ 350 جىلدىعىن تويلاۋ وسىمەن ءتامامدالمايدى. ءۇش اي ارالىعىندا ءتۇرلى حالىقارالىق كونفەرەنسيالار وتكىزۋ، جىرشى-تەرمەشى رەسپۋبليكالىق بايقاۋىن ۇيىمداستىرۋ، قاراعاندى جانە وڭتۇستىك قازاقستان وبلىستارىنىڭ اكىمدىكتەرى اراسىندا ءوزارا سەرىكتەستىك تۋرالى مەموراندۋم جاساۋ، قاراعاندى وبلىسى دەلەگاتسياسىنىڭ تۇركىستانداعى قوجا احمەت ياسساۋيدىڭ كەسەنەسىنە رەسمي ساپارى، ەسكە الۋ اسى، س. سەيفۋللين اتىنداعى وبلىستىق قازاق دراما تەاترىندا «قازىبەك ءبي» سپەكتاكلىنىڭ پرەمەراسى، قازاقستان ۇلتتىق مۇراجايىنىڭ قورىنان قاز داۋىستى قازىبەك ءبيدىڭ شاپانى كورسەتىلەتىن كورمەنىڭ اشىلۋ سالتاناتىن وتكىزۋ، 2 تومدىق كىتاپ شىعارۋ، دەرەكتى فيلم، جانە فوتوالبوم شىعارۋ جوسپارلانىپ وتىر.