استانالىق داياشى ءوزىنىڭ سۋرەتىن رۇقساتسىز پايدالانعان تۇنگى كلۋبتان 350 مىڭ تەڭگە ءوندىرىپ الماق
بۇل تۋرالى قازاقپارات استانا قالالىق سوتىنىڭ باسپا ءسوز قىزمەتىنە سىلتەمە جاساپ حابارلايدى. «استانا تۇرعىنى ەلورداداعى «MrBingo» كلۋبىندا داياشى بولىپ 1 اي جۇمىس ىستەگەن. سوسىن ءوز ەركىمەن جۇمىستان شىعىپ كەتكەن. كەيىننەن ول الگى كلۋبتىڭ الدىندا ءوزىنىڭ داياشى كيىمىمەن تۇسكەن سۋرەتى بار باننەردى كەزدەيسوق كورىپ قالادى. باننەردەگى سۋرەت ونىڭ كەلىسىمىنسىز ورناتىلعان بولىپ شىقتى»، - دەپ حابارلايدى باسپا ءسوز قىزمەتى. قازاقستان رەسپۋبليكاسىنىڭ زاڭىنا سايكەس، قانداي دا ءبىر تۇلعانىڭ سۋرەتىن ونىڭ كەلىسىمىنسىز پايدالانۋعا، جاريالاۋعا ەشكىمنىڭ قۇقى جوق. ال ەگەر سۋرەتتە بەينەلەنگەن تۇلعا قايتىس بولعان بولسا، رۇقسات ونىڭ زاڭدى مۇراگەرىنەن الىنۋى كەرەك.
«استانا قالاسى الماتى اۋداندىق سوتى شاعىمدانۋشىنىڭ ارىزىن قاراپ، مورالدىق شىعىنى ءۇشىن كلۋبتان 350000 تەڭگە ءوندىرۋ تۋرالى شەشىم شىعاردى. سوت شەشىمى زاڭدى كۇشىنە ەنگەن جوق»، - دەلىنگەن باسپا ءسوز بايانىندا.
اۆتور: قانات مامەتقازى ۇلى
