الماتىعا ءۇندىستاننان 34 توننا مەديتسينالىق جۇك جەتكىزىلدى
بۇل دارىلەر الماتى اكىمدىگىنىڭ ءدارى-دارمەكتەردىڭ تۇراقتىلىق قورىن قۇرۋعا بولگەن قارجى ەسەبىنەن ساتىپ الىندى.
ەسكە سالساق، ماۋسىم ايىنىڭ سوڭىندا ءدارى-دارمەك تاپشىلىعىن جويۋ ماقساتىندا الماتى اكىمى باقىتجان ساعىنتايەۆتىڭ شەشىمى بويىنشا، كوروناۆيرۋسقا قارسى پرەپاراتتاردى كوتەرمە باعادا ساتىپ الۋ ءۇشىن پايىزسىز قارجىلاندىرۋعا 5 ميلليارد تەڭگە بولىنگەن ەدى. بۇدان وزگە، كوۆيدتى ستاتسيونارلاردى ءدارى-دارمەك پرەپاراتتارىمەن قامتاماسىز ەتۋ ماقساتىندا رەزەرۆتىك قور قۇرۋ ءۇشىن تاعى 5 ميلليارد تەڭگە ءبولىندى.
قازىرگى كەزدە پرەپاراتتاردىڭ جارتىجىلدىق قورىن جاساۋ بويىنشا بەلسەندى جۇمىستار ءجۇرىپ جاتىر. ال بۇل ءدارى-دارمەكتەردىڭ تاپشىلىعىن جويىپ، ولاردىڭ ءدارىحانالار مەن ينفەكتسيالىق ستاتسيونارلارعا ىركىلىسسىز جەتكىزىلۋىن قامتاماسىز ەتەدى.
بۇگىن جەتكىزىلگەن ءدارى-دارمەكتەر پارتياسىندا:
انتيكواگۋليانت، ەناكسوپارين، گەپارين؛
انتيباكتەريالدى - وفلوكساتسين؛
قابىنۋعا قارسى پرەپاراتتار - پرەدنيزالون، دەكسامەتازون؛
انتيبيوتيكتەر - تسەفترياكسون، مەروپەنەم؛
قىزۋدى تۇسىرەتىن - پاراتسەتامول؛
ۆيرۋسقا قارسى پرەپارات - وسەلتاميۆير بار.
«وتكەن جۇمادان باستاپ ءدارى-دارمەكتەرگە دەگەن سۇرانىستىڭ تومەندەگەنى، ۇزاق كەزەكتىڭ ازايعانى بايقالادى. جالپى، جاعداي وڭالۋدا. تۇراقتىلىق قورى ارقىلى ءدارىحانالارعا پرەپاراتتاردى جەتكىزۋمەن قاتار، ءبىز كوۆيدتى گوسپيتالدەردى ءدارى-دارمەكتەرمەن جەدەل قامتاماسىز ەتۋ ءۇشىن رەزەرۆتىك قوردى جاساۋدامىز. ءدارى-دارمەكتەردىڭ جارتىجىلدىق قورى فارمكومپانيالاردىڭ قويمالارىندا ساقتالادى، قاجەت بولعان كەزدە بۇل پرەپاراتتار ستاتسيونارلارعا بولىنەدى»، - دەپ حابارلادى الماتى اكىمدىگىنىڭ قالانى ءدارى-دارمەك پرەپاراتتارىمەن قامتاماسىز ەتۋ جونىندەگى ۇيلەستىرۋشىسى زاڭعار سالىمبايەۆ.
ونىڭ مالىمدەۋى بويىنشا، الماتىعا 23- شىلدەدە تۇركيادان «كلەكسان» پرەپاراتى جەتكىزىلەدى.
جەتكىزۋشى بۇل پرەپاراتتىڭ شامامەن 40 مىڭ بىرلىگىن اكەلەتىن بولادى. 31- شىلدەگە دەيىن قوسىمشا تاعى 150 مىڭ بىرلىكتەگى كلەكسان جەتكىزۋ جوسپارلانعان.
جالپى، الداعى اپتادا انتيكوگۋليانتتىڭ شامامەن 300 مىڭعا جۋىق بىرلىگى جەتكىزىلەدى. بۇل - قالاعا 10- شىلدەدەن باستاپ قاجەتتى ءدارى-دارمەكتەردى جەتكىزگەن جەتىنشى رەيس. وسى ايدىڭ سوڭىنا دەيىن تاعى ەكى رەيس كەلەدى دەپ كۇتىلۋدە.
قالاعا شامامەن 7,5 ميلليون قاپتاما ءدارى دارمەك جەتكىزىلگەن. كەدەندىك راسىمدەۋدەن سوڭ پرەپاراتتار قالا ءدارىحانالارىنا بولىنەتىن بولادى.
قالا اكىمدىگى تاراپىنان ءدارى-دارمەك جۇكتەرىنىڭ جەدەل راسىمدەلۋى ءۇشىن پارمەندى شارالار جۇزەگە اسۋدا.
م ك د- ءنىڭ الماتى قالاسى بويىنشا «جەتىسۋ» كەدەن پوستىسىنىڭ باسشىسى تالعات جاڭبىربايەۆ ەلىمىزگە كەلىپ جەتكەن مەديتسينالىق زاتتارى بار گۋمانيتارلىق جانە كوممەرتسيالىق جۇكتەردى راسىمدەۋ ۋاقىتىنىڭ ەداۋىر قىسقارعانىن اتاپ ءوتتى.
«گۋمانيتارلىق جۇكتەر كەدەندىك تولەمدەرسىز، تەز ارادا راسىمدەلۋدە. راسىمدەۋ ۋاقىتى 5-10 مينۋت. فارمكومپانيالاردىڭ كوممەرتسيالىق پارتيالارىن راسىمدەۋگە 10-20 مينۋت كەتەدى. ايتا كەتەرلىگى، ءبىز قازىر تاۋلىك بويىنا جۇمىس ىستەۋ رەجيمىنە كوشتىك. بۇرىن تۇندە كەلگەن جۇك تاڭەرتەڭگىسىن راسىمدەلەتىن. ءبىز قازىر كەلگەن جۇكتى دەر كەزىندە راسىمدەپ، كۇندىز دە، تۇندە دە دامىل تاپپاي، جۇمىس جاساۋدامىز. ءبىز ۇنەمى بايلانىستامىز، ويتكەنى ومىرلىك ماڭىزى بار جۇك ءبىر مينۋتقا دا كەشىكپەۋى ءتيىس»، - دەدى ت. جاڭبىربايەۆ.
