مۇعالىمدەر ءۇشىن 33 وليمپيادا مەن كونكۋرس العاش رەت ەنگىزىلدى – ب ع م
ايتا كەتەيىك، ءبىلىم جانە عىلىم مينيسترلىگىنىڭ وليمپيادالار تىزبەسىن بەكىتۋ بويىنشا ءتيىستى وزگەرىستەر ەنگىزىلدى. بۇل ءوز كەزەگىندە ساپالىق وزگەرىستەرگە قاتىستى. وسى جىلعا دەيىنگى وليمپيادالاردىڭ تىزبەسىندە 56 وليمپيادالىق ءىس- شارا قاراستىرىلعان بولسا، بەكىتىلگەن تىزىمدە 175 ءىس- شاراعا دەيىن كەڭەيتىلدى.
«سونىمەن قاتار، تىزبەگە بيىلدان باستاپ پەداگوگتارعا ارنالعان 33 وليمپيادا مەن كونكۋرس العاش رەت ەنگىزىلدى. ولاردىڭ ناتيجەلەرى پەداگوگتاردى بىلىكتىلىك بەرۋگە اتتەستاتتاۋ كەزىندە ەسكەرىلەتىن بولادى. اشىقتىق، اكادەميالىق ادالدىق، قاتىسۋشىلار ءۇشىن تەڭ جاعداي جاساۋ جانە ءادىل ناتيجەلەر - جارىستاردى وتكىزۋدى اۆتوماتتاندىرۋ ەسەبىنەن قامتاماسىز ەتىلەدى»، - دەدى ش. كارينوۆا.
ونىڭ ايتۋىنشا، ەگەر وسى ءىس- شارالاردى ۇيىمداستىرۋشىلاردىڭ اكادەميالىق ادالدىق، زاڭدىلىق، اشىقتىق، وبەكتيۆتىلىك، تەگىن وتكىزۋ قاعيداتتارىن بۇزۋ فاكتىلەرى انىقتالسا، وندا وليمپيادا نەمەسە كونكۋرس تىزبەدەن الىنىپ تاستالاتىن بولادى. ءدال وسىنداي قاعيداتتار مەن كريتەرييلەر جاڭا ءىس- شارالار تىزبەسىنە ەنگىزۋ ءۇشىن دە ەسكەرىلەتىن بولادى.
وسىلايشا، مينيسترلىك ەلىمىزدە وتكىزىلەتىن كونكۋرستار مەن وليمپيادالاردىڭ ساپاسى مەن تيىمدىلىگىن ارتتىرۋعا نيەتتى. بۇدان بۇرىن حابارلانعانداي، ءبىلىم جانە عىلىم مينيسترلىگى ۇيىمداستىراتىن وليمپيادالار وقۋشىلار ءۇشىن اقىسىز نەگىزدە بولادى. سونىمەن قاتار قازىرگى كەزدە قازاقستاندىق ءبىلىم بەرۋ نارىعىندا جەكەمەنشىك كاسىپورىندار مەن ۇيىمدار دا وسى قىزمەتتەردى اقىلى ۇسىنىپ كەلەدى.
«ءبىراق ءبىلىم جانە عىلىم مينيسترلىگىنىڭ بۇل اقىلى جارىستارعا ەشقانداي قاتىسى جوق ەكەنىن اتاپ وتەمىن. سوندىقتان بالالار مەن مۇعالىمدەر، مەكتەپتەر ءارتۇرلى وليمپيادالار مەن كونكۋرستارعا وقۋشىلاردىڭ قاتىسۋىن تاڭداعان كەزدە مۇقيات بولۋىنا كەڭەس بەرەمىز»، - دەدى شولپان كارينوۆا.
اۆتور: رۋسلان عابباسوۆ
