كەلەر جىلى اقتوبەدە ءابىلقايىر حاننىڭ 330 جىلدىعى اتالىپ وتەدى

اقتوبە. قازاقپارات - كەلەر جىلى ءابىلقايىر حاننىڭ 330 جىلدىعىنا وراي ت. احتانوۆتىڭ «انت» قويىلىمى ساحنالانادى. ال ت. احتانوۆتىڭ 100 جىلدىق مەرەيتويى اياسىندا حالىقارالىق فورۋم- فەستيۆال ۇيىمداستىرىلادى.

بۇل تۋرالى اقتوبە وبلىستىق مادەنيەت، مۇراعاتتار جانە قۇجاتتاما باسقارماسىنىڭ باسشىسى ايتتى، دەپ حابارلايدى قازاقپارات ءتىلشىسى.

اقتوبە وبلىستىق مادەنيەت، مۇراعاتتار جانە قۇجاتتاما باسقارماسى جىلدى قورىتىندىلاپ، كەلەر جىلى قانداي جۇمىستار اتقارىلاتىنىن ايتتى.

وبلىستا 20 مىڭنان استام مادەني شارا وتكىزىلمەك. اتاۋلى داتالار مەن مەرەيتويلار ەسكەرۋسىز قالمايدى.

«بەيبارىس سۇلتاننىڭ 800، ءابىلقايىر حاننىڭ 330، سىرىم دات ۇلىنىڭ 300، ت. جۇرگەنوۆتىڭ 125، ت. احتانوۆتىڭ 100، ءو. كاناحيننىڭ 100، ن. تاپالوۆانىڭ 100 جىلدىعىنا ارنالعان بىرنەشە شارا بار. ءابىلقايىر حاننىڭ 330 جىلدىعىنا وراي ت. احتانوۆتىڭ «انت» قويىلىمىن ساحنالانىپ، ت. جۇرگەنوۆتىڭ 125 جىلدىعىنا وراي Ⅵ حالىقارالىق «Balausa» ەكسپەريمەنتالدى سپەكتاكلدەر فەستيۆالى وتەدى. ال ت. احتانوۆتىڭ 100 جىلدىق مەرەيتويىنا وراي حالىقارالىق فورۋم- فەستيۆال، اتاقتى ءبيشى، جەرلەسىمىز نۇرسۇلۋ تاپالوۆانى 100 جىلدىعىنا ارنالعان حالىقتىق بي ۇجىمدارى بايقاۋى ۇيىمداستىرىلادى»، - دەدى اقتوبە وبلىستىق مادەنيەت، مۇراعاتتار جانە قۇجاتتاما باسقارماسىنىڭ باسشىسى التىناي يۋنيسوۆا.

سونىمەن بىرگە وبلىستا «باقىتتى بالا» حالىقارالىق V اشىق بالالار فەستيۆال- بايقاۋى، «جۇبانوۆتار اۋەنى-2023» حالىقارالىق ۆوكاليستەر فەستيۆال - بايقاۋى، «ادەبيەت. رۋح. قوعام» رەسپۋبليكالىق فورۋمى، رەسپۋبليكالىق «جىبەك جولى» ەسترادالىق انشىلەر بايقاۋى ۇيىمداستىرىلادى. «تەاتر ونەردىڭ ۇلى كوشى» رەسپۋبليكالىق حالىقتىق تەاترلار فەستيۆالى، «سايگۇلىك» اتتى ت. دوسىموۆ اتىنداعى رەسپۋبليكالىق گيتارامەن ءان ورىنداۋشىلار بايقاۋى، «قوبىلاندى دەگەن ەرى بار» رەسپۋبليكالىق جىرشىلار بايقاۋى، «Music Fest Open Air» اشىق اسپان استىنداعى مۋزىكالىق فەستيۆالىن وتكىزۋ جوسپارلانعان.

وڭىردە ەسكەرتكىشتەردى زەرتتەۋ، قازبا جۇمىستارىن جۇرگىزۋ، ونى ناسيحاتتاۋ، تانىمال ەتۋ باعىتىنداعى جۇمىس تا جالعاسادى.

«2023-2025 -جىلدارعا ارنالعان جوسپار بار. بارلىق ەسكەرتكىشتەردى تىركەپ، عىلىمي اينالىمعا ەنگىزۋ ءۇشىن اقپارات جيناۋ جالعاسادى. كەيىن ارنايى جيناق بولىپ شىعادى. ءبىزدىڭ ءوڭىر - ەسكەرتكىشكە باي. سول بايلىقتى ساقتاپ قالۋ ماقساتىندا ولقىلىقتى بولدىرماۋىمىز كەرەك. ماسەلەن قوبدا اۋدانىنداعى ابات بايتاق قورىمىندا جەرلەنگەن جەر كوپ. قازىرگى كەزدە ادامدار اتا- باباسىن ىزدەپ، تاۋىپ، ۇلىقتاۋ ءۇشىن بەيىتتى جاڭارتىپ كەتەدى. بۇل دۇرىس ەمەس. اۋدان، وبلىستاعى زەرتتەۋشىلەرگە ەشتەڭە ەسكەرتپەيدى، ءسويتىپ ءبىزدى ناقتىلىقتان ايىرادى»، - دەدى وبلىستىق ولكەتانۋ مۋزەيىنىڭ ديرەكتورى مەيرام دۇيسەنعالي.

ونىڭ ايتۋىنشا، الداعى ۋاقىتتا عۇن ءداۋىرىنىڭ ەسكەرتكىشتەرى زەرتتەلەدى.

«ءۇش جىلعا جۋىق بارلاۋ، انىقتاۋ جۇمىسى ءجۇردى. ناتيجەسىندە عۇن ءداۋىرىنىڭ مىڭعا جۋىق ەسكەرتكىش انىقتالدى. ەندى ماقسات - ساقتاپ قالۋ، زەرتتەۋ، ناسيحاتتاۋ، الەمدىك دەڭگەيدە تانىتۋ. وتاندىق عىلىمي ورتالىقتاردى، اكادەميالىق ينستيتۋتتار مەن شەتەلدىڭ جەتەكشى عالىمدارى مەن عىلىمي ورتالىقتارىنىڭ كومەگىمەن زەرتتەۋ جۇمىسىن جۇرگىزەمىز»، - دەدى مۋزەي ديرەكتورى.

ايتا كەتەيىك، 2023 -جىلى وڭىردە مادەنيەت سالاسىنداعى عيماراتتاردى جوندەۋ جۇمىسى جالعاسادى. بارلىعى 5 جوباعا 463 ميلليون تەڭگەگە جۋىق قارجى قاراستىرىلدى.

«ايتەكەبي اۋدانى ت. جۇرگەنوۆ اۋىلىنداعى «سەليننيك» اۋىلدىق مادەنيەت ءۇيى، العا اۋدانى تامدى اۋىلدىق كلۋبى، العا اۋدانى تىكقايىڭ اۋىلدىق كلۋبى، العا اۋدانى قاينار اۋىلىنداعى كلۋب، مارجانبۇلاق مادەنيەت ءۇيى تىزىمدە بار. بارىنە كۇردەلى جوندەۋ جۇمىسى جۇرگىزىلەدى»، - دەدى التىناي يۋنيسوۆا.

اۆتور

التىناي ساعىندىقوۆا