شىلىم شەككەن قاراعاندىلىقتارعا 32 ميلليون تەڭگە ايىپپۇل سالىندى

قاراعاندى. قازاقپارات - قاراعاندىدا تەمەكى تارتقاندار 32 ميلليون تەڭگەدەن استام ايىپپۇل سالىندى.

التى ايدا جينالعان ايىپپۇلدىڭ سوماسى وسىنداي، دەپ حابارلايدى قازاقپارات ءتىلشىسى.

قاراعاندى وبلىستىق ىشكى ىستەر دەپارتامەنتى وكىلدەرىنىڭ ايتۋىنشا، 2018 -جىلدىڭ باسىنان بەرى التى مىڭعا تارتا ادامعا ايىپپۇل سالىنعان. ادامدار كوبىنەسە ۇيلەردىڭ كىرەبەرىسىندە، كوپشىلىك دەمالىس ورىندارىندا جانە مەملەكەتتىك ۇيىمداردا شىلىم تارتىپ، زاڭدى بۇزادى.

قاراعاندى وبلىسىندا كوپشىلىك دەمالىس ورىندارىندا تەمەكى تارتقان 192 تۇرعىن جاۋاپقا تارتىلعان. مەملەكەتتىك ۇيىمداردا تەمەكى تارتقان 274 ادام، ءبىلىم مەكەمەلەرىندە 988 ادام، ۇيلەردىڭ كىرەبەرىسىندە تەمەكى ءتۇتىنىن بۇرقىراتقان 2074 ادام اكىمشىلىك جاۋاپقا تارتىلعان.