تارازدا وتەتىن «ۇلى دالا ويىندارىنىڭ» جۇلدە قورى 32 ميلليون تەڭگە - ا. نۇرىليەۆ

استانا. قازاقپارات - قازاق حاندىعىنىڭ 550 جىلدىعىنا وراي 8-9- قازان كۇندەرى تارازدا وتەتىن «ۇلى دالا ويىندارى» جارىسىنىڭ جۇلدە قورى 32 ميلليون 300 مىڭ تەڭگەنى قۇرايدى.

بۇل تۋرالى بۇگىن استانادا وتكەن باسپا ءسوز ءماسليحاتى بارىسىندا جامبىل وبلىسى اكىمىنىڭ ورىنباسارى ابدالى نۇراليەۆ ءمالىم ەتتى.

«قازىر قازاقستان جۇرتشىلىعىنىڭ نازارى تاراز وڭىرىنە اۋىپ وتىر. سەبەبى، قازان ايىنىڭ 8-9- جۇلدىزىندا تاراز قالاسىندا قازاق حاندىعىنىڭ 550 جىلدىق مەرەيتويىنىڭ جالعاسى بولادى. سوندىقتان، ءدۇبىرلى تويعا جان-جاقتى دايىندالىپ جاتىرمىز. جوسپارلانعان شارالاردىڭ تۇگەلدەي دەرلىگى دايىن دەۋگە بولادى. اتاپ ايتسام، «قازاق حاندىعى» مونۋمەنتىنىڭ قۇرىلىسى اياقتالدى، 9- قازاندا سالتاناتتى اشىلۋ ءراسىمى بولادى. قازىر مونۋمەنتتىڭ اينالاسىن اباتتاندىرۋ جۇمىستارىن دا اياقتاپ قالدىق. تاراز قالاسىنىڭ اۋەجايى دا جوندەۋدەن ءوتتى. ال، مەرەكەلىك ءىس-شارالار اياسىندا ۇلتتىق سپورت تۇرلەرى قاۋىمداستىعىنىڭ ۇيىتقى بولۋىمەن «ۇلى دالا ويىندارىن» وتكىزەمىز. قاۋىمداستىقپەن بىرلەسىپ شارانىڭ جوسپارىن بەكىتتىك، سول جوسپارعا سايكەس، الامان بايگە، توپ بايگە، ۇشقىر بايگە وتەدى»، - دەپ حابارلادى ا. نۇراليەۆ.

«ۇلى دالا ويىندارىن وتكىزۋگە تەك دەمەۋشىلەر تاراپىنان اقشا ءبولىندى. ياعني، اكىمدىك نەمەسە مەملەكەتتىك بيۋدجەتتەن ارنايى قارجى بولىنگەن جوق. وسى رەتتە، ۇلتتىق سپورت تۇرلەرىن دامىتۋعا ۇلەس قوسىپ جاتقان دەمەۋشىلەردىڭ جومارتتىعىن ايتا كەتۋ كەرەك. سونىمەن، جۇلدە قورىنا توقتالسام، الامان بايگەنىڭ 1-ورنىنا 10 ميلليون تەڭگە، 2-ورىنعا 5 ميلليون تەڭگە، 3-ورىنعا - 2 ميلليون تەڭگە، تاعى جەتى اتقا اقشالاي جۇلدەلەر بەرىلەدى. وسىلايشا، تەك الامان بايگەنىڭ جۇلدە قورى 19 ميلليون تەڭگەنى قۇراپ وتىر. ەكىنشى بايگە - توپ بايگەدە جۇيرىك بەس جىلقىعا جۇلدە بەرىلەدى. توپ بايگەدە 1- كەلگەن ات يەسىنە - 5 ميلليون تەڭگە، 2-ورىن العان اتقا 2 ميلليون تەڭگە، ءۇشىنشى ورىن العان جىلقى يەسىنە 1 ميلليون تەڭگە، 4- ورىنعا 500 مىڭ تەڭگە، بەسىنشى كەلگەن جىلقىعا 300 مىڭ تەڭگە جۇلدە تىگىلىپ وتىر. ال، ۇشقىر بايگەدە ءبىرىنشى كەلگەن جىلقى يەسىنە 3 ميلليون تەڭگە، ەكىنشى ورىن يەسى 1 ميلليون تەڭگە، 3-ورىن يەسىنە 500 مىڭ تەڭگە بەرىلەدى. جالپى، «ۇلى دالا ويىندارى» جارىسىنىڭ جۇلدە قورى 32 ميلليون 300 مىڭ تەڭگەنى قۇرايدى. تاعى دا باسا ايتقىم كەلەدى، بۇل ويىنداردى وتكىزۋگە بيۋدجەتتەن ەشقانداي قارجى تارتىلعان جوق، دەمەۋشىلەردىڭ قولداۋىمەن وتكەلى وتىر»، - دەدى ايماق باسشىسىنىڭ ورىنباسارى.

اۆتور: كەنجەكەي توقتامۇرات قىزى