دەپۋتاتتار 31 -مامىر كۇنى كوڭىل كوتەرۋ ورىندارىنىڭ جۇمىسىن شەكتەۋدى ۇسىندى
وسى ورايدا ول بۇگىن پارلامەنت ءماجىلىسىنىڭ جالپى وتىرىسىندا ۇكىمەت باسشىسىنىڭ ورىنباسارى گۇلشارا ءابدىقالىقوۆانىڭ اتىنا دەپۋتاتتىق ساۋال جولدادى، دەپ حابارلايدى قازاقپارات ءتىلشىسى.
«1997 -جىلدان باستاپ جىل سايىن ەلىمىزدىڭ تۇرعىندارى قازاقستان اۋماعىندا جانە ونىڭ شەگىنەن تىس جەردە بيلىك تاراپىنان قۋعىن-سۇرگىنگە ۇشىراعان بارلىق ادامداردى ەسكە الىپ، لاگەرلەردەن قايتىپ ورالماعان نەمەسە اشتان قايتىس بولعان تۋىستارى مەن جاقىندارىن، تاعدىردىڭ ايداۋىمەن جەر اۋدارۋ كەزەڭىندە قازاق جەرىندە بولعان ميلليونداعان ادامداردى ەسكە الادى. جاپا شەككەندەردى ءوز وتانىندا قارسى العان قازاق حالقى ولارعا قول ۇشىن بەرىپ، قولداۋ كورسەتتى، تاعدىر تالكەگىنە قالدىرماي، قيىن ومىرلىك جاعدايدا امان قالۋعا كومەكتەستى.
وكىنىشكە قاراي، قۋعىن-سۇرگىن، جەر اۋدارۋ قۇرباندارىنىڭ، لاگەر تۇتقىندارىنىڭ تاعدىرى تۋرالى تولىعىراق ءبىلۋ كوپشىلىك جاعدايدا مۇمكىن ەمەس. قازىرگى ۋاقىتتا كوپتەگەن قۇجاتتار ق ر باس پروكۋراتۋراسى قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ باسقارمالارىندا، ق ر ءى ءى م ارحيۆتەرىندە جاتىر. مەملەكەتىمىزدىڭ تاريحىنا قاتىسى بار ارحيۆتەر مەن قورلار كەشەندى تۇردە زەرتتەلىپ، ولارعا تەرەڭ تالداۋ جۇرگىزىلۋى جانە وسى زەرتتەۋ ناتيجەلەرى حالىقتىڭ نازارىنا جەتكىزىلۋى ءتيىس دەپ سانايمىز»، - دەدى دەپۋتات نۇرلان دۋلاتبەكوۆ.
ونىڭ سوزىنە قاراعاندا، 80 جىلدان استام ۋاقىت بويى ۇزاق ساقتالۋىنا وراي، كوپتەگەن ارحيۆتىك قۇجاتتار قازىردىڭ وزىندە وقۋعا جارامسىز ەكەنىن، سەبەبى، سيامەن جازىلعان جازبالاردىڭ بىرتە-بىرتە ءوشىرىلىپ، كۇڭگىرتتەنەتىنىن اتاپ ءوتتى.
«بىزگە عالىمداردىڭ اتالعان قۇجاتتاردى بەلسەندى تۇردە زەردەلەۋىنە رۇقسات بەرۋ كەرەك. كەيبىر كورشىلەس مەملەكەتتەردە كەڭەستىك كەزەڭنىڭ ارحيۆتىك ماتەريالدارى مەن قۇجاتتارى اشىلدى. ەندى عىلىم وكىلدەرى ولاردى بەلسەندى تۇردە زەردەلەي وتىرىپ، تەرەڭ تۇجىرىمدار مەن قورىتىندىلار جاساۋعا مۇمكىندىك الىپ وتىر. ويتكەنى، وتكەننىڭ تاريحي تاجىريبەسىن ەسكەرمەي، جاڭا قوعامدى قۇرۋ قيىنعا سوعادى. سوندىقتان وسى ارحيۆتىك ماتەريالداردى تالداۋ ءبىز ءۇشىن وتە ماڭىزدى. سول جىلدارداعى قايعىلى وقيعالاردىڭ تولىق كورىنىسىن قالپىنا كەلتىرۋ ءۇشىن بار كۇش-جىگەردى جۇمساۋ قاجەت»، - دەدى دەپۋتات.
وسى ورايدا جوعارىدا ايتىلعانداردىڭ نەگىزىندە ءتيىستى مينيسترلىكتەر مەن مەملەكەتتىك ورگاندارعا شارالار كەشەنىن قابىلداۋ كەرەكتىگى اتالىپ ءوتتى.
«بۇل تۇرعىدا ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىن وتكىزۋدىڭ ءبىرىڭعاي تۇجىرىمداماسىن ازىرلەپ، ونى ەلىمىزدەگى جاستار جىلىمەن ساباقتاستىرۋ قاجەت، سونىمەن قوسا، تەلەديدار مەن راديوداعى بۇكىل ويىن-ساۋىق كونتەنتى شەكتەلىپ، كەز كەلگەن كونسەرتتىك جانە وزگە دە ءىس-شارالار، كوڭىل كوتەرەتىن ورىندار بەلگىلى ءبىر نورمامەن جۇمىس ىستەۋى كەرەك. ارحيۆتىك ماتەريالداردى ەركىن زەردەلەۋ، عالىمداردىڭ ارحيۆتىك قۇجاتتاردى تالداۋ جانە جاريالاۋ مۇمكىندىگىن الۋى، كونفەرەنسيالار، سيمپوزيۋمدار وتكىزۋ ءۇشىن جاعداي جاساي وتىرىپ، سول جىلدارداعى وقيعالارعا وبەكتيۆتى ءارى تولىق زەرتتەۋ جۇرگىزۋ قاجەت. قۋعىن-سۇرگىنگە ۇشىراعان جانە قايتىس بولعان وتانداستارىمىزدىڭ اتىن قالپىنا كەلتىرۋ، ال قاجەت بولعان جاعدايدا، ولاردى اقتاۋ جونىندەگى جۇمىس جالعاستىرىلۋى ءتيىس»، - دەدى ن. دۋلاتبەكوۆ.