تاجىكستان قازاقستانعا قوسىمشا 315 ميلليون تەكشە مەتر سۋارمالى سۋ بەرەتىن بولدى
مۇنداي ۋاعدالاستىققا قوس ەلدىڭ سالا مينيسترلەرىنىڭ كەزدەسۋىندە قول جەتكىزىلدى، دەپ حابارلايدى قازاقپارات.
«بيىلعى جىلى سىرداريا وزەنىنىڭ باسسەينىندەگى سۋ تاپشىلىعىنا بايلانىستى كۇردەلى سۋ جاعدايى قالىپتاستى. وسىعان وراي ق ر ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ دۋشانبە قالاسىندا تاجىكستاننىڭ ەنەرگەتيكا جانە سۋ رەسۋرستارى ءمينيسترى د. دجۋمامەن كەزدەستى. ونىڭ بارىسىندا تاجىك تاراپىمەن «باحري توچيك» سۋ قويماسىنان بيىلعى جىلعى ماۋسىم-تامىز ارالىعىندا 315 ميلليون تەكشە مەتر سۋدى قوسىمشا اعىزۋ تۋرالى ۋاعدالاستىققا قول جەتكىزىلدى»، - دەلىنگەن مينيسترلىك اقپاراتىندا.
ءمالىم ەتىلگەندەي، بۇل كولەم تۇركىستان جانە قىزىلوردا وبلىستارىندا ۆەگەتاتسيالىق كەزەڭدە سۋارمالى سۋ تاپشىلىعىن تومەندەتۋگە مۇمكىندىك بەرەدى.
«تۇركىستان جانە قىزىلوردا وبلىستارىنىڭ قاجەتتىلىكتەرى ءۇشىن سىرداريا وزەنى باسسەينىندەگى سۋ جاعدايىنىڭ قيىندىعىن ەسكەرە وتىرىپ، تاجىك تاراپى قىرعىزستان رەسپۋبليكاسى توقتوعۇل سۋ قويماسىنان اعىزاتىن سۋ كولەمىنەن باسقا، ماۋسىمنان تامىزعا دەيىن «باحري توچيك» سۋ قويماسىنان قوسىمشا 315 ميلليون تەكشە مەتر سۋ جەتكىزۋگە كەلىستى. قازاقستان ءوز كەزەگىندە تاجىكستانعا «باحري توچيك» سۋ قويماسىنىڭ قوسىمشا جۇمىس ىستەۋىنىڭ تەرىس سالدارى تۋىنداعان جاعدايدا ماتەريالدىق-تەحنيكالىق قولداۋ كورسەتەدى»، - دەپ اتاپ ءوتتى ماعزۇم مىرزاعاليەۆ.
